Арганізатары чэмпіянату кажуць, што яны не чакаюць нейкіх сур’ёзных праблемаў. Але, натуральна, яны робяць захады бясьпекі, і захады гэтыя даволі сур’ёзныя. Мясцовая паліцыя адсочвае замежнікаў, якія прыяжджаюць у Японію і Паўднёвую Карэю на час чэмпіянату. Прычым праца тут вядзецца ў кантакце з паліцыяй іншых краінаў – краінаў, зь якіх могуць прыехаць футбольныя хуліганы. Японія, да прыкладу, ужо адмовіла ў дазволе на ўезд некалькім брытанскім грамадзянам, якія былі ў “чорных сьпісах” брытанскай паліцыі.
Арганізатары чэмпіянату таксама разьлічваюць, што многія замежныя хуліганы папросту ня здолеюць прыехаць на чэпіянат з-за нястачы грошай – бо дарога дялёкая, і квіткі ў Японію ці Карэю з Эўропы нятанныя. А менавіта з эўрапейскіх краінаў паходзіць большасьць футбольных хуліганаў. На кожным з матчаў чэмпіянату будзе прысутнічаць каля 7 тысячаў паліцыянтаў, якія будуць сачыць за парадкам. І, нарэшце, будуць прынятыя адмысловыя захады бясьпекі супраць тэрарыстаў. Гэта першыя футбольныя спаборніцтвы такога ўзроўню пасьля леташніх тэрактаў у Амэрыцы, таму службам бясьпекі дадаецца працы. Падчас чэмпіянату ў зонах вакол стадыёнаў будуць забароненыя палёты, а ў паветры будуць вайсковыя самалёты. Так што падрыхтоўка да чэмпіянату з боку сілаў бясьпекі вядзецца сур’ёзная. Але заходнія аглядальнікі папярэджваюць, што паліцыя Японіі можа быць усё роўна не гатовая да змаганьня з футбольнымі хуліганамі, бо ў Японіі, у адрозьненьне ад Паўднёвай Карэі, няма досьведу нейкіх масавых забурэньняў.
У амэрыканскім часопісе “Time” даволі зьняважліва апісваюцца дзеяньні японскіх службаў бясьпекі падчас таварыскага матчу Японія – Коста-Рыка напярэдадні чэмпіянату. Тут пішацца, што на матчы панаваў абсалютны хаос, і натоўп заўзятараў нікім не кантраляваўся.
На тым матчы заўзятары былі ў мірным настроі, але што здарыцца, калі на стадыёне будзе, да прыкладу, натоўп ангельскіх футбольных хуліганаў, якія сумна вядомыя сваімі гвалтоўнымі паводзінамі? Хоць квіткі ў Японію ды Паўднёвую Карэю насамрэч дарагія, на чэмпіянаце ўсё роўна чакаецца каля 8 тысячаў ангельскіх заўзятараў. Павінныя таксама прыехаць брытанскія паліцыянты, каб дапамагчы мясцовай паліцыі кантраляваць сваіх суайчыньнікаў.
Гэтыя футбольныя хуліганы ўсё ж такі больш хуліганы, чым заўзятары. Гэта паўкрымінальныя групы, якія карыстаюцца з футболу. У Ангельшчыне гэта зрабіць лягчэй, бо гэта краіна-заснавальніца футболу, краіна з моцнымі традыцыямі футбольнага заўзятарства. У Ангельшчыне нават арцыбіскуп Кентэрбэрыйскі дазволіў сьвятарам перанесьці ранішнюю нядзельную службу на пазьнейшы час, бо ў гэтую нядзелю ангельская зборная будзе гуляць свой першы матч на чэмпіянаце сьвету. Кіраўнік ангельскай царквы патлумачыў сваё рашэньне прыкладна такім чынам: “Набажэнства, натуральна, перадусім, але такое адбываецца раз на чатыры гады, так што мы можам гэта сабе дазволіць”. Сам арцыбіскуп, праўда, матч пагледзець ня здолее, бо яму давядзецца весьці набажэнства, якое нельга перанесьці – ангельская каралева будзе спраўляць 50-годзьдзе з дня каранацыі. Дарэчы, першагіерарх ангельскай царквы – сам футбольны заўзятар, ён падтрымлівае клюб “Арсэнал”. Сярод ангельскіх сьвятароў таксама досыць заўзятараў –некаторыя ўжо напісалі адмысловыя гімны датычна чэмпіянату, каб скарыстаць іх у нядзельных набажэнствах. А адзін сьвятар нават замовіў вялікі экран каля царквы, каб людзі маглі пагледзець футбол пасьля службы.