Лінкі ўнівэрсальнага доступу

УЛАДЗІМЕР МУЛЯВІН ДЫХАЕ САМАСТОЙНА, АЛЕ СТАН ЯГО ПА-РАНЕЙШАМУ ВЕЛЬМІ ЦЯЖКІ


Ігар Карней, Менск

Былы дырэктар Інстытуту траўматалёгіі і артапэдыі прафэсар Іосіф Варановіч, які рабіў апэрацыю Мулявіну 14 траўня, акрэсьлівае сытуацыю толькі ў агульных рысах. Пры гэтым цалкам зразумела, што менавіта Варановіч ведае пра стан хворага ўсё.

(Варановіч: ) “Разумееце, якая сытуацыя. Усю інфармацыю павінны даводзіць рэанімацыя, дзе ён ляжыць, і дырэктар інстытуту. Што тычыцца агульнага стану, то ён вельмі цяжкі: пералом шостага і сёмага шыйных пазванкоў, сьцісканьне сьпіннога мозгу, частковы параліч рук і поўны параліч ног. Пра ўсё астатняе сказаць нічога не магу”.

На жаль, ні згаданая прафэсарам Варановічам рэанімацыя, ні тым больш дырэктар інстытуту Яўген Белаенка ніякай дадатковай інфармацыі не даюць. Пытаюся ў аднаго з хірургаў: ці праўдзівыя паведамленьні некаторых СМІ, што Мулявін пайшоў на папраўку. У прыватнасьці, рухае рукамі, расплюшчвае вочы — наагул, знаходзіцца ў прытомнасьці.

(Хірург: ) “Ды не, стан па-ранейшаму цяжкі, ніякіх кардынальных зьменаў няма. Ведаючы сытуацыю ў мэдычным пляне, нічога ня сьведчыць пра тое, што ідзе аднаўленьне. Так, чаго не было дагэтуль — магчыма, зьявілася; але нельга гарантаваць, што так будзе і надалей. Я б нават сказаў, што да гэтага няма наогул ніякіх падставаў (хоць цуды бываюць усялякія). Агульны стан стабілізавалі, сёньня здымаем апарат штучнага дыханьня і пераводзім на дыханьне самастойнае. Сам ён у прытомнасьці, але, натуральна, неадэкватна рэагуе, бо знаходзіцца пад узьдзеяньнем лекаў і нармальны кантакт наладзіць немагчыма. Стан стабільна цяжкі — можна сказаць так. Пра перавод у звычайную палату няма ніякай гаворкі. Гэта будзе зусім ня хутка, калі наогул сытуацыя будзе складвацца больш-менш нармальна”.

Спрабую высьветліць у свайго суразмоўцы: чым выкліканая такая таямнічая заслона вакол Уладзімера Мулявіна? Прынамсі, як сьведчыць замежны досьвед, у падобных выпадках тэрмінова ствараецца нешта накшталт прэсавага цэнтру, дзе акумулюецца ўся інфармацыя пра стан здароўя папулярнай асобы.

(Хірург: ) “Чаму ігнаруюць прэсу? Ну, прасіла жонка ніякай інфармацыі не даваць. Бадай, зараз толькі з гэтай прычыны”.

Зь іншых інстытуцкіх крыніцаў стала вядома, што мажлівая таямніца выкліканая і тым, што сёньня лябараторны аналіз крыві Мулявіна даў станоўчую рэакцыю на ўтрыманьне ў ёй алькаголю. Варта нагадаць, што аварыя здарылся падчас Радаўніцы, калі ў Беларусі памерлых традыцыйна ўспамінаюць пад моцныя напоі.

Няма ніякіх новых зьвестак і ад супрацоўнікаў Дзяржаўнай аўтаінспэкцыі: ні тэхпашпарту на “Мэрсэдэс”, ні пасьведчаньня кіроўцы пасьля агляду машыны ды асабістых рэчаў ня знойдзена.

Нагадаю, што асноўнай вэрсіяй аварыі 14 траўня лічыцца значнае перавышэньне хуткасьці на небясьпечным участку дарогі Заслаўе–Калодзішчы.
XS
SM
MD
LG