Лінкі ўнівэрсальнага доступу

У ВАРШАВЕ БЫЛЫ ГАРАДЗЕНСКІ БІЗНЭСОВЕЦ ВЫЙГРАЎ СУД СУПРАЦЬ ПОЛЬСКАЙ ГАЗЭТЫ “TRYBUNA”


Аляксей Дзікавіцкі, Варшава

Яшчэ на пачатку судовага працэсу, прадстаўнік газэты “Trybuna” Лех Влашчук запрапанаваў Станіславу Буйніцкаму заключыць пагадненьне, паводле якога газэта зьмяшчае афіцыйнае абвяржэньне, а таксама выплочвае кампэнсацыю за маральныя страты. У сытуацыі Станіслава Буйніцкага гэта вельмі выгодна, аднак на пагадненьне ён не пайшоў.

(Буйніцкі: ) “Я б пайшоў на пагадненьне, але ўчора да мяне патэлефанаваў адвакат газэты “Trybuna” і, здаецца, ад імя гэтай газэты пагражаў, што калі я хачу спакойна жыць у Польшчы, то мушу пайсьці на пагадненьне.

Прадстаўнік газэты “Trybuna”, адвакат Лех Влашчук паведаміў нашаму радыё, што ніколі такога не казаў.

(Влашчук: ) “Гэта, напэўна, памылка з прычыны дрэннага веданьня мовы. Я ў шоку ад таго, што пачуў”.

У Горадні Станіслаў Буйніцкі быў буйным бізнэсоўцам і шмат дапамагаў дэмакратычнаму руху, што не зусім падабалася мясцовым уладам. У будынку ягонай фірмы месьціліся офісы недзяржаўных арганізацыяў і нават друкарня грамадзкай арганізацыі “Ратуша”, дзе друкаваліся незалежныя выданьні. Ліст да польскіх уладаў у падтрымку Буйніцкага падпісалі, сярод іншых, былы кандыдат на пасаду прэзыдэнта Беларусі Сямён Домаш і рэдактар гарадзенскай “Пагоні” Мікола Маркевіч.

Чатыры гады таму ў газэце “Trybuna” зьявіўся артыкул, у якім польскае консульства ў Горадні абвінавачвалася ў тым, што арэндуе памяшканьні ў чалавека, якога ў Беларусі шукаюць за даўгі, а той быццам бы хаваецца ад міліцыянтаў на тэрыторыі консульства. Гаворка йшла пра Станіслава Буйніцкага, бо менавіта ён і ягоная фірма былі ўласьнікамі будынкаў, дзе месьцілася польскае дыпляматычнае прадстаўніцтва.

Паводле словаў спадара Буйніцкага, беларускія ўлады выкарысталі гэтую публікацыю ў якасьці нагоды для пачатку ягонага перасьледу. У выніку каля двух гадоў таму бізнэсовец быў вымушаны зьехаць у Польшчу, дзе хутка атрымаў грамадзянства гэтай краіны.

“Праз гэты артыкул ў газэце “Trybuna” я згубіў усё”, – сказаў у часе суду Станіслаў Буйніцкі.

Па разглядзе справы Варшаўскі акруговы суд пастанавіў, што газэта сапраўды закранула асабісты гонар Станіслава Буйніцкага, зьмясціўшы артыкул зь безпадстаўнымі абвінавачаньнямі. Газэце “Trybuna” прыйдзецца зьмясьціць абвяржэньне і выплаціць спадару Буйніцкаму каля тысячы амэрыканскіх даляраў у якасьці кампэнсацыі маральных стратаў.
XS
SM
MD
LG