Лінкі ўнівэрсальнага доступу

logo-print

1 ТРАЎНЯ Ў БЕЛАРУСІ АДЗНАЧАЎСЯ ДЗЕНЬ ПРАЦЫ


Міхал Стэльмак, Менск

Апоўдні ля станцыі мэтро "Акадэмія Навук" у Менску сабралася каля 5 тысяч сяброў Фэдэрацыі. Адсюль па вуліцы Сурганава ў бок плошчы Бангалёр пачалося шэсьце, дазволенае Менгарвыканкамам. Міліцыя, якая назірала за парадкам, клопатаў ня мела — рабочыя, настаўнікі, работнікі культуры, будаўнікі, прафсаюзныя актывісты дысцыплінавана ішлі у калёнах. Яны несьлі плякаты з надпісамі "Прафсаюзы за эканамічныя рэформы, але не за кошт народу", "Прэзыдэнт! Дзе абяцаная зарплата ў 100 даляраў?", "За годнае жыцьцё", "У адзінстве наша сіла" і да т.п.

(Рабочы: ) "Я прыйшоў сюды, каб праявіць салідарнасьць у змаганьні за павышэньне ўзроўню жыцьця”.

(Іншы рабочы: ) "Эканоміка ўжо ляжыць на дне. Няма працы і няма заробкаў".

(Шалапаў: ) "Я старшыня прафкаму Старадароскага дзіцячага дому. У нас праблемы такія ж, як і паўсюль: затрымкі з выплатай заробкаў. Апошнім разам нашыя пэдагогі атрымлівалі толькі аванс за красавік. А паколькі многія жанчыны ў нас выхоўваюць дзяцей як адзінокія маці, людзі ўжо жывуць напаўгалоднымі”.

(Карэспандэнт: ) "На сёньня вам хапае заробкаў, каб годна жыць?”

(Рабочая: ) “Не!"

(Яцко: ) "Працую на менскім авіярамонтным заводзе. Сёньня мяне прывяло сюды тое, што ў прафсаюзаў зараз цяжкі час. Бо ўлады ўсё робяць для таго, каб падзяліць на кавалкі ды знішчыць прафсаюзы. Таму ў той час, калі большасьць насельніцтва пайшла сёньня на агароды, лецішчы, каб як-небудзь пракарміць сябе пад восень, я вырашыў прыйсці сюды і падтрымаць акцыю”.

(Дубараў: ) "Гэта яшчэ і сьвята пратэсту. Супраць усёй той "хунты", што ўсталявалася сёньня на нашай зямлі. Трэба, каб усе аб'ядналіся незалежна ад поглядаў. Бо усім сёньня кепска, усім цяжка жыць".

Апроч сяброў Фэдэрацыі, у шэсьці бралі ўдзел беларускія камуністы. Гаворыць сакратар ПКБ Алена Скрыган:

(Скрыган: ) "Салідарнасьць вельмі неабходная сёньня беларускаму народу. Бо наступленьне ўладаў на правы працоўных сёньня як ніколі жорсткае. Гэта і ўвядзеньне платнай мэдыцыны, і павышэньне пэнсійнага ўзросту, гэта і рост цэн, і інфляцыя".

Таксама разам зь сябрамі прафсаюзаў у калёнах ішлі прадстаўнікі моладзевых арганізацыяў — "Працоўнай моладзі", анархісты.

(Швайба: ) “Я — старшыня Беларускай моладзевай арганізацыі "Працоўная моладзь". Тут усе сьцягі. Тут стаяць рабочыя, стаіць моладзь. Моладзь розных арыентацыяў. Мы, напрыклад, сацыял-дэмакратычная арганізацыя”.

(Хлапец: ) "Мы прадстаўляем Беларускі анархафронт”.

(Карэспандэнт: ) "Зь якой мэтай вы бераце ўдзел ў сёньняшняй прафсаюзнай акцыі?”

(Яшчэ адзін халапец: ) “Гэтае сьвята больш належыць нам, а ня тым, хто стаіць пад чырвонымі і сінімі сцягамі”.

(Карэспандэнт: ) “Чаму вам, а ня ім?”

(Анархіст: ) "Бо першымі, хто наладзіў традыцыю гэтага сьвята, былі анархісты. Простыя мараканскія рабочыя".

У парку Дружбы народаў адбыўся мітынг. Вось як пракамэнтаваў нашаму радыё сёньняшнюю акцыю старшыня Фэдэрацыі Франц Вітко:

(Вітко: ) "Мы разумеем яе як працяг дзеяньняў прафсаюзаў у справе абароны працоўных і сацыяльна-эканамічных правоў сяброў прафсаюзаў. Бо сёньня вельмі складаная эканамічная сытуацыя, сытуацыя на прадпрыемствах. Адпаведна вельмі складаныя ўмовы для забесьпячэньня своечасовай выплаты заробкаў. Мы бачым, што пагаршаюцца прававыя ўмовы працоўных".
XS
SM
MD
LG