Лінкі ўнівэрсальнага доступу

ПАЧАЛІ СУДЗІЦЬ ЗАТРЫМАНЫХ УДЗЕЛЬНІКАЎ НЕСАНКЦЫЯВАНАГА ШЭСЬЦЯ 19 КРАСАВІКА


Любоў Лунёва, Менск

Зранку канвой развозіў затрыманых удзельнікаў акцыі па судах. Паколькі судзіць павінны былі каля 40 чалавек, улады вырашылі разьдзяліць затрыманых на групы і разьвезьці ў розныя суды. Пятнаццаць чалавек прывезьлі ў Савецкі раённы суд, 15 — у Партызанскі і прыкладна столькі ж — у Цэнтральны. У Савецкі суд прывезьлі арганізатараў акцыі Міколу Халезіна, Зьмітра Бандарэнку і Юрыя Хашчавацкага.

Валерыя Шчукіна сярод іх не было. Яго шукалі ўвесь дзень. Міліцыянты казалі, што Шчукіна прывязуць пазьней, але сказаць, дзе ён, адмаўляліся. Людзей трымалі ў "аўтазаках". Канвой не дазваляў перадаць ежу. Толькі праз дзьве гадзіны пагадзіліся перадаць ваду.

Першай судзілі Алесю Анджыеўскую. Руслан Казадаеў арыштаваў яе на пяць сутак. Кацярыну Дзятко з Барысава пакаралі штрафам у 30 мінімальных заробкаў. Некалькі справаў, у тым ліку і справу Леаніда Садоўскага, суд з прычыны няправільнага афармленьня адаслаў у міліцыю, каб іх там перапісалі.

Судзьдзя Руслан Казадаеў разгладаў справу кінарэжысэра Юрыя Хашчавацкага даволі доўгі час. Юры Хашчавацкі абвінаваціў улады ў парушэньні заканадаўства. Ён зьвярнуў увагу суду на тое, што арганізатары падавалі заяўку ў Менгарвыканкам на правядзеньне дэманстрацыі, а замест дазволу чыноўнікі прапанавалі правесьці мітынг на плошчы Бангалёр, што ёсьць парушэньнем заканадаўства.

Юры Хашчавацкі прапанаваў судзьдзі прыцягнуць да адказнасьці чыноўнікаў Менгарвыканкаму і тых, хто даў загад зьбіваць і затрымліваць людзей. Судзьдзя арыштаваў Юрыя Хашчавацкага на 10 сутак. У судовай залі кінарэжысэр паведаміў Радыё Свабода:

(Хашчавацкі: ) "Ну, я адсяджу 10 сутак, а дзе і колькі сутак будуць сядзець тыя, хто дзейнічае такім чынам. Перад маімі вачыма праходзіць сцэна, якую я ўбачыў па тэлебачаньні, як міністар былой Югаславіі застрэліўся на прыступках парлямэнту. Я мяркую, што многіх нашых “дзеячоў” чакае менавіта такі лёс. У мяне ёсьць 10 сутак, каб падумаць (не, ужо 7)!"

Зьміцер Бандарэнка папрасіў адваката, і суд перанесьлі на заўтра. Празь нейкі час да яго падыйшлі міліцыянты з канвою і пачалі цягнуць у аўтазак. Зьміцер адмовіўся йсьці і лёг на падлогу:

(Бандарэнка: ) "Зараз два чалавекі знаходзяцца ў аўтазаку абсалютна незаконна. У іх позвы на заўтра на 11.30. Калі судзьдзя выпісвае позву, то людзі вольныя і могуць ісьці куды заўгодна. Замест гэтага міліцянты іх схапілі, пасадзілі ў аўтазак і кажуць, што зноў павязуць на Акрэсьціна. Гэта “беспрадзел”, кажучы па-расейску, бо перайшлі ўжо ўсе межы. Вы ж бачылі, як зьбівалі людзей, якія не супраціўляліся. Прыбярыце рукі! Прыбярыце рукі і вярніце мне пашпарт!”

У Цэнтральным судзе Зьміцер Бародзька пакараны 5 суткамі арышту. Віталь Вядзевіч арыштаваны на 7 сутак, Андрэй Пятроў — на трое, Аляксандар Атрошчанкаў — 5 сутак, Сяргей Рабкевіч — 7 сутак, Зьміцер Цанунін — на трое сутак. Анатоль Аскерка правядзе ў спэцпрыёмніку-разьмеркавальніку 10 сутак арышту, Вераніка Купчанка, Юры Бубер і Яўген Афнагель — па трое сутак. Зьміцер Голубеў , Аляксей Яшчанка, Віктар Соіч, Аляксандар Грыдзюшка, Вячаслаў Ігнатовіч арыштаваныя на пяць сутак. Раман Казакевіч і Алесь Карповіч правядуць ў спэцпрыёмніку па 10 сутак арышту.

У Партызанскім судзе большасьць затрыманых папарасілі адвакатаў, і суды перанесьлі на іншыя дні. Некалькі чалавек пакараныя штрафамі ў 30 мінімальных заробкаў.

Валерыя Шчукіна, як і тых затрыманых ўдзельнікаў акцыі, якім яшчэ ня вынесьлі прысуды, адвезьлі зноў у спэцпрыёмнік-разьмеркавальнік на вуліцу Акрэсьціна. Ніколі раней улады не ўжывалі такую меру. Назіральнікі лічаць гэта парушэньнем заканадаўства.

Сёньня ў офіс "Хартыі'97" прыйшло паведамленьне ад міжнароднай праваабарончай арганізацыі "Amnesty Inernational" аб тым, што ўсе затрыманыя ўдзельнікі дэманстрацыі 19 красавіка прызнаныя вязьнямі сумленьня.

Заўтра ў суды гарадзкі канвой прывязе затрыманых, справы якіх не пасьпелі разгледзець сёньня, альбо перанесьлі на заўтра. Сярод іх — арганізатары шэсьця Мікалай Халезін, Зьміцер Бандарэнка і Валеры Шчукін.

Справы некалькіх дзясяткаў непаўнагадовых удзельнікаў акцыі будуць разглядаць адпаведныя камісіі ў райвыканкамах.
XS
SM
MD
LG