Лінкі ўнівэрсальнага доступу

ПАСЬЛЯ АРЫШТУ БАНДАЖЭЎСКАГА СПЫНІЎСЯ ШЭРАГ ДАСЬЛЕДАВАНЬНЯЎ ПРА ЎЗЬДЗЕЯНЬНЕ РАДЫЯЦЫІ НА АРГАНІЗМ ЧАЛАВЕКА


Казімер Яноўскі, Гомель

Распавядае кандыдат мэдычных навук з катэдры фізіяпаталёгіі Арцём Вейнер.

(Вейнер: ) “Была агульная тэма ўзьдзеяньня інкарпараваных радыёнуклідаў на сыстэмы арганізму чалавека. Ад яе адыходзіла шмат падтэмаў: уплыў радыяцыі на арганізм, які разьвіваецца, на зародак чалавека, на кровеўтварэньне і іншае. Даследаваньні вяліся на шэрагу катэдраў, кіраўніком быў Юры Іванавіч. Зараз па радыяцыйным узьдзеяньні асобна нічога не вядзецца”.

Узьдзеяньне радыяцыі наўпрост не вылучаецца з агульных экалягічных праблемаў, хаця ранейшыя дасьледаваньні паказвалі залежнасьць стану здароўя ад колькасьці радыёнуклідаў у арганізьме.

Вось што сказала з гэтай нагоды кандыдат мэдычных навук, вучаніца Юрыя Бандажэўскага Ала Заранкіна:

(Заранкіна: ) “Мы вывучалі ўплыў радыёнуклідаў на сардэчна-сасудзістую сыстэму дзяцей раньняга ўзросту з парушэньнямі страваваньня. Трэба сказаць, што мы знайшлі вялікую долю сардэчна-сасудзістай паталёгіі ў дзяцей, менавіта сардэчнай мышцы. Усе дзеці мелі пэўны ўзровень радыёцэзію ў арганізьме, і ўсе дзеці — больш як 99% — мелі адпаведныя парушэньні”.

Калега Заранкінай з катэдры педыятрыі, таксама кандыдат мэдычных навук Сьвятлана Іўкіна з удзячнасьцю ўспамінае навуковыя дасьледаваньні пад кіраўніцтвам Бандажэўскага. Аднак пытаюся ў яе пра іншае:

(Карэспандэнт: ) “Скажыце, Сьвятлана Сьцяпанаўна, ці зьмяніўся зараз фармат дасьледаваньняў? Ці сталі яны больш шырокімі? Ці, наадварот, дасьледаваньні ўзьдзеяньня радыяцыйнага цэзію на арганізм чалавека звузіліся?”

(Іўкіна: ) “Звузіліся, канешне. Мы зараз не выяжджаем нікуды. Дзяцей маем магчымасьць абсьледаваць толькі тых, якія знаходзяцца ў стацыянары. Гэта і гарадзкія дзеці, і бываюць з забруджаных раёнаў. Праводзіцца тое, што магчыма ў нашых умовах у рамках стацыянару. Але дасьледаваньні ў залежнасьці ад назапашваньня радыёнуклідаў у нас зараз не вядуцца”.

Паводле яе словаў, цяпер нават і прыбораў адпаведных няма. Прафэсар Бандажэўскі ў свой час дамаўляўся з рознымі арганізацыямі на арэнду патрэбных прыбораў, і катэдры атрымлівалі магчымасьць для дасьледаваньняў.
XS
SM
MD
LG