Лінкі ўнівэрсальнага доступу

logo-print

ПАЧЫНАЕЦЦА ВІЗЫТ НА БЛІЗКІ ЎСХОД ДЗЯРЖСАКРАТАРА ЗША КОЛІНА ПАЎЭЛА


Юры Дракахруст, Прага

Паводле зьвестак ізраільскага камандаваньня, падчас ваеннай апэрацыі, якая пачалася 29 сакавіка, было арыштавана больш як 4000 палестынцаў, у тым ліку 120 асобаў, якія наўпрост датычныя да тэрору. Ізраіль сьцьвярджае, што амаль цалкам усталяваў кантроль у буйных палестынскіх гарадох Джэнін, Наблус і Рамала.

Аднак інфармацыйныя агенцтвы перадаюць, што ў Наблусе працягваюцца жорсткія баі. За два тыдні баёў пад Джэнінам загінулі 23 ізраільскія жаўнеры і ня менш як 100 палестынцаў. Учора падчас візыту да войскаў, што дысьлякаваныя каля Джэніну, прэм’ер-міністар Ізраілю Арыель Шарон заявіў:

(Шарон: ) “Наша права і абавязак – бараніць жыцьцё нашых грамадзянаў, і ніхто ня мае права ціснуць на нас і перашкаджаць працы нашых выбітных жаўнераў і афіцэраў, якія мусяць працягнуць і завершыць змаганьне”.

Шарон адзначыў, што падчас ваеных апэрацыяў ізраільскага войска часам церпяць цывільныя асобы, аднак дадаў, што мэта тэрарыстаў – якраз мірнае насельніцтва. Учора ж чарговы тэрарыстычны акт адбыўся ў ізраільскім горадзе Хайфа. Тэрарыст-самазабойца зьнішчыў сябе і восем ізраільцаў.

Напярэдадні візыту на Блізкі Ўсход дзяржсакратара ЗША Паўэла Ізраіль вывеў свае войскі з 24-х палестынскіх паселішчаў. Гэта дало падставу прэсаваму сакратару прэзыдэнта ЗША заявіць, што цяпер неабходны сустрэчны крок палестынскага боку – ён мяркуе, што палестынская аўтаномія і арабскія дзяржавы мусяць асудзіць тэрарызм, спыніць фінансаваньне тэрору і падбухторваньне да гвалту ў дзяржаўных мэдыях.

Учора ў Мадрыдзе адбылася нарада дзяржсакратара ЗША Паўэла з прадстаўнікамі ААН, Эўразьвязу і Расеі. Удзельнікі нарады заклікалі Ізраіль тэрмінова спыніць ваенную апэрацыю на палестынскіх тэрыторыях і адначасна асудзілі палестынскі тэрор.

Колін Паўэл мяркуе, што канфлікт на Блізкім Усходзе ня мае ваеннага вырашэньня.

(Паўэл: ) “Незалежна ад таго, наколькі эфэктыўнымі будуць дзеяньні ізраільскага войска па вынішчэньні каранёў тэрарызму, застануцца людзі, гатовыя да тэрору, гатовыя на самазабойчыя тэракты, у чым мы пераканаліся ў апошнія дні, ужо пасьля пачатку ваеннай апэрацыі Ізраілю. Гвалт спараджае гвалт – і гэтак будзе да таго часу, пакуль не адновіцца перамоўны працэс, пабудаваны на даверы адзін да аднаго”.

Напярэдадні свайго візыту Паўэл заявіў, што мае намер сустрэцца з палестынскім лідэрам Арафатам, які знаходзіцца ў аблозе ў сваёй рэзыдэнцыі ў Рамала. Прэм’ер-міністар Ізраілю Шарон лічыць, што намер дзяржсакратара ЗША сустрэцца з Арафатам зьяўляецца трагічнай памылкай. Аднак Паўэл выказаў меркаваньне, што Арафат застаецца лідэрам палестынскага народу, і Ізраілю раней ці пазьней давядзецца весьці зь ім перамовы.
XS
SM
MD
LG