Лінкі ўнівэрсальнага доступу

logo-print

НА ВОЛЮ ВЫЙШАЎ АПОШНІ АРЫШТАВАНЫ ЎДЗЕЛЬНІК МЕНСКАЙ ДЭМАНСТРАЦЫІ НА ДЗЕНЬ ВОЛІ


Альгерд Невяроўскі, Менск

Да брамы вядомага многім менскім апазыцыянэрам прыёмніка на вуліцы Акрэсьціна сёньня прыйшлі каля 20 чалавек. Актывісты Маладога Фронту, Хартыі’97 і БНФ, а таксама маці, жонка й сын сустракалі Вячаслава Сіўчыка, які паводле рашэньня судзьдзі Натальлі Вайцяховіч 15 дзён правёў за кратамі. Жанчыны сустрэлі спадара Сіўчыка песьняй.

Аднадумцы сустракалі Вячаслава Сіўчыка з шампанскім і цукеркамі. Спадар Сіўчык не шкадуе, што страціў 15 дзён у турме:

(Сіўчык: ) "Тут няма чаго шкадаваць. Прабачце, не мая віна ў тым, што сёньня Беларусь пад акупацыяй, не мая віна, што сёньня прамаскоўскі рэжым Лукашэнкі тут. Я абсалютна не шкадую, бо 25 сакавіка для мяне сьвятая дата, і я ведаю, якія людзі пры ўладзе ў нашай краіне".

У турме Сіўчык чытаў газэты і вёў гутаркі на грамадзка-палітычныя тэмы са сваімі сукамернікамі. Ён сьцьвярджае, што гэтыя размовы мелі плён. Паводле Вячаслава Сіўчыка, міліцэйскае начальства напярэдадні Вялікадня не пусьціла да яго ў камэру сьвятара, хаця ён як хрысьціянін хацеў паспавядацца.

У часе свайго зьняволеньня спадар Сіўчык зрабіў і пэўныя высновы што да таго, як мусіць праходзіць сьвяткаваньне Дня Незалежнасьці ў Беларусі:

(Сіўчык: ) "Мне вельмі хацелася б, каб на наступнае сьвяткаваньне Дня Волі быў агульны нацыянальны аргкамітэт, у які б уваходзілі прадстаўнікі ўсіх партыяў і рухаў, якія лічаць гэтае сьвята сваім. Бо гэтае сьвята павінна аб'ядноўваць увесь народ. Вельмі шкада, што быў нейкі загад зьверху й мяне не дапусьцілі да ўсіх нашых калегаў, якія сядзелі за Дзень Волі. Калі б мы сядзелі з хлопцамі, мы б напісалі адкрыты ліст у раду Беларускай Народнай Рэспублікі, каб і сама спадарыня Івонка Сурвілла, і гэтая ўстанова прыклалі ўсе намаганьні, каб у Беларусі былі створаныя кааліцыйныя структуры й Дзень Волі праходзіў узгоднена. Партыі могуць праводзіць свае мерапрыемствы, але ж прыйшоў час дамаўляцца й рабіць усё разам".

Жонка Вячаслава Сіўчыка Ганна ўдзячная ўсім, хто прыйшоў сустрэць яе мужа:

(Ганна Сіўчык: ) "Прыемна, што прыйшлі людзі сустрэць Вячаслава. Заўсёды прыемна адчуваць падтрымку ня толькі блізкіх сяброў, але ж і проста знаёмых, і нават тых, чые прозьвішчы мне невядомыя. Натуральна, што мы вельмі чакалі бацьку, радыя, што ён на волі й з намі".

А Вячаслаў дадаў, што арышт яго не напалохаў і ён абавязкова возьме ўдзел у акцыі апазыцыі 19 красавіка й у Чарнобыльскім шляху 26 красавіка.
XS
SM
MD
LG