Яшчэ напачатку году Баранавіцкая рада Таварыства беларускай мовы імя Францішка Скарыны зьвярнулася да начальніка гарадзкога ўпраўленьня адукацыі Ігара Стасевіча зь лістом, у якім прапаноўвалася, каб адна з гімназій гораду насіла імя знакамітага вучонага Ігната Дамейкі, 200-я ўгодкі якога сёлета шырока адзначаюцца ў сьвеце. Такая прапанова была абгрунтаваная найперш тым, што жыцьцё Ігната Дамейкі цесна зьвязана з Баранавіччынай, тут ягоныя карані па лініі маці.
У адказе ўпраўленьня адукацыі, які зьмяшчае ў сваім тэксьце сем граматычных і сынтаксычных памылак, гарадзкой радзе ТБМ паведамляецца пра тое, што ў дваццаці дзьвюх школах гораду на сёньня ёсьць сем клясаў з профільным вывучэньнем беларускай мовы і літаратуры, а адкрыцьцё ў Баранавічах гімназіі імя Ігната Дамейкі нямэтазгоднае. Пры гэтым ліст утрымлівае спасылку на тое, што ў вырашэньні пытаньня былі ўлічаныя інтарэсы і пажаданьні бацькоў і навучэнцаў.
Якім чынам улічваліся тыя інтарэсы і пажаданьні, высьветліць не ўдалося, затое кіраўнікі тых пяці гімназій, што існуюць сёньня ў Баранавічах, кажуць, што нічога ня чулі пра такую ініцыятыву, а на маё пытаньне, як бы яны паставіліся да таго, каб менавіта іхнай гімназіі прысвоілі імя знакамітага Ігната Дамейкі адказ я чуў адзін — “вельмі станоўча”.
