Лінкі ўнівэрсальнага доступу

НА ШЭРАГУ ГОМЕЛЬСКІХ ПРАДПРЫЕМСТВАЎ РАБОЧЫЯ НЯ МАЮЦЬ ПРАЦЫ


Казімер Яноўскі, Гомель

Дырэктар заводу “Крышталь” Аляксандр Старавойтаў распавёў, што ягоная адміністрацыя спрабавала нават дамовіцца з расейскімі прадпрыемствамі на часовае працаўладкаваньне высокакваліфікаваных апрацоўшчыкаў прыродных алмазаў.

(Старавойтаў: ) “Каб людзі нашыя ня страцілі кваліфікацыю, кармілі свае сем'і, мы спрабавалі арганізавана ад імя заводу вахтавым мэтадам вазіць людзей у Расею. Аднак расейскія алмазаапрацоўчыя прадпрыемствы такую прапанову не прынялі. Шмат рабочых самастойна зьехалі ў тую ж Расею, іншыя краіны, дзе алмазаапрацоўка не заняпала, і атрымліваюць там сур'ёзны заробак. Астатнія вымушаныя ў горадзе шукаць пабочны занятак, альбо сядзець без заробку. Мы ня ведаем нават, дзе яны знаходзяцца”.

Цяжкае становішча “Крышталю”, што закранула каля 1400 рабочых, зьвязанае з абмежаваньнямі Расеі на ўвоз у Беларусь прыродных алмазаў. Расейскія Дзярждума і Савет Фэдэрацыі не ратыфікавалі дагэтуль леташняе травеньскае міжурадавае пагадненьне пра пастаўку гамельчукам алмазаў.

У вымушаным адпачынаку знаходзіцца зараз калектыў тлушчакамбінату. На камбінаце засталася толькі рамонтная служба. Фінансавае становішча прадпрыемства не дазваляе купіць алей для вытворчасьці маянэзу, мыла. Прадстаўнікі адміністрацыі Навабеліцкага раёну і гарвыканкаму абіваюць парогі Саўміну з тым, каб на ўрадавым узроўні была прынятая пастанова пра падатковыя льготы тлушчакамбінату.

Тым часам крамы і рынкі Гомеля запаланяе расейская ды ўкраінская прадукцыя.

Пакуль тры дні на тыдзень працуе ў Навабеліцкім раёне і завод хімічнага мелу.

Мэблевае аб'яднаньне “Гомельдрэў” хаця і не спыняла вытворчасьць, але сутыкнулася з сур'ёзнай праблемай рэалізацыі сваёй прадукцыі. З прычыны высокага кошту мэбля стала не канкурэнтаздольнай на расейскім рынку, на які апошнія гады арыентавалася аб'яднаньне. Скарочаны нават выпуск запалак, бо рэалізацыя іх прыносіць аб'яднаньню толькі страты.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG