Лінкі ўнівэрсальнага доступу

СУД АДМОВІЎСЯ РАЗГЛЯДАЦЬ ПАЗОЎ СТАРШЫНІ БЕЛАРУСКАГА ГЕЛЬСЫНСКАГА КАМІТЭТУ ТАЦЯНЫ ПРОЦЬКІ ДА ГАЗЭТЫ "СОВЕТСКАЯ БЕЛОРУССИЯ"


Алег Грузьдзіловіч, Менск

Судзьдзя Савецкага раённага суду Менску Марына Фёдарава вырашыла не разглядаць пазоў Тацяны Процькі да газэты адміністрацыі прэзыдэнта "Советская Белоруссия". Канфлікт паміж спадарыняй Процькай і галоўнай дзяржаўнай газэтай краіны судзьдзя палічыла палітычнай спрэчкай, і на гэтай падставе пазоў не задаволіла.

Між тым старшыня БГК Тацяна Процька перакананая, што газэта яе зьняважыла ды прычыніла шкоду яе прафэсійнай рэпутацыі.

(Процька: ) "Мяне публічна абвінавацілі ў тым, што я шпіёнка. Само гэтае абвінавачаньне для мяне прыкрае, бо я вельмі люблю сваю радзіму і ніколі, нават у думках, яе ня здраджвала.

Па-другое, я працую старэйшым навуковым супрацоўнікам у Інстытуце гісторыі і вывучаю такую складаную тэму, як роля спэцслужбаў у сацыяльна-палітычным развіцьці БССР. Бяз працы ў архівах спэцслужбаў гэтую тэму дасьледаваць немагчыма, але пасьля публікацыі ў "Советской Белоруссии" для мяне доступ у архівы аказаўся закрытым".

Гаворка ідзе пра артыкул "Апэрацыя "Белы бусел", надрукаваны ў спэцвыпуску "Советской Белоруссии" летась 5 верасьня. У артыкуле сьцьвярджалася, што старшыня БГК Процька разам зь іншымі апазыцыянэрамі і замежнікамі нібыта рыхтуе гвалтоўны захоп улады і зьвяржэньне Лукашэнкі.

Газэта спасылалася на дадзеныя спэцслужбаў Беларусі. Судзьдзя Фёдарава, аднак, не пажадала разьбірацца з тым, хто мае рацыю — спэцслужбы разам з "СБ" ці старшыня БГК Тацяна Процька. Адвакат Гары Паганяйла гэтую пазыцыю судзьдзі лічыць юрыдычна памылковай і вылучае сваю вэрсію прычынаў адхіленьня пазову.

(Паганяйла: ) "У публікацыі ні пра якую спрэчку няма гаворкі. Там спасылаюцца на канфідэнцыйныя дадзеныя спэцслужбаў і ў якасьці крыніцы называецца Рада бясьпекі, але потым і КГБ і Рада бясьпекі адказалі на нашыя запыты, што ня маюць такіх зьвестак.

Нагадаю, гэтая хлусьня зьявілася напярэдадні прэзыдэнцкіх выбараў, наклад спэцвыпуску газэты быў большым за палову мільёна, людзі атрымалі яго бясплатна ў паштовыя скрыні. Суд баіцца нават закранаць гэты факт, бо адкрытае судовае разьбіральніцтва паказала б, што падчас выбараў улады ішлі наўпрост на фальсыфікацыю".

Тацяна Процька пасьля суду заявіла, што ў цяперашняй Беларусі стала звычайнай зьявай, калі суды абараняюць гонар і годнасьць грамадзянаў выбарачна, ў залежнасьці ад таго, належыць грамадзянін да ўлады ці да апазыцыі.

Нагадаю, месяц таму гарадзкі суд Менску гэтак жа адхіліў пазоў старшыні АГП Анатоля Лябедзькі да беларускага тэлебачаньня і рэжысэра Азаронка. Іхныя беспадстаўныя абвінавачаньні Лябедзькі ў атрыманьні з-за мяжы тысячаў даляраў суд таксама палічыў "палітычнай спрэчкай".

XS
SM
MD
LG