Лінкі ўнівэрсальнага доступу

logo-print

ЯК БЕЛАРУСЫ СТАВЯЦЦА ДА МІЛІЦЫІ?


Ганна Соусь, Менск

Ці здольная беларуская міліцыя абараніць сваіх грамадзянаў? Адметна, што большасьць апытаных мной людзей адказалі на гэтае пытаньне адмоўна. Гаворыць пэнсіянэр спадар Іван:

(Спадар Іван: )"Не, там шмат карумпаваных і несправядлівых. Даверу да іх няма".

(Карэспандэнтка: )"А вы сутыкаліся з гэтым у жыцці, калі так сьцьвярджаеце?

(Спадар Іван: ) "І сустракаўся, і бачу іхнае стаўленьне да народу".

А вось меркаваньне прадпрымальніка Сяргея:

(Сяргей: ) "Напэўна здольная, калі яе столькі. Наша міліцыя нас беражэ — спачатку пасадзіць, потым сьцеражэ. Вось такая думка пра нашую міліцыю".

Многія мае суразмоўцы распавядалі пра свой досьвед стасункаў зь міліцыяй. Прыкладам, школьнік Алег Гнедчык узгадаў акцыю Маладога Фронту ў дзень сьвятога Валянціна:

(Гнедчык: ) "Забіралі нявінных людзей. Была такая дзяўчына Чарныш, да яе падляцелі амонаўцы й пачалі біць па нырках, потым забралі. Калісьці ў Курапатах пяском засыпалі, забіралі, білі. Я мяркую, што яны нас не абараняюць".

Сярод апытаных былі й тыя, хто пацярпеў ад беларускай міліцыі зусім нядаўна. Гаворыць беспрацоўны Андрэй:

(Андрэй: ) "Як можа абараніць той чалавек, які спыняе мяне на вуліцы, выхоплівае, запытвае дакумэнты. Да таго ж нахабна спыняе, ледзь не заламвае рукі. І мяне гэты чалавек будзе абараняць?"

А вось пэнсіянэр спадар Алесь ставіцца да міліцыі з павагай і ўпэўнены, што яна здольная абараніць беларусаў:
(Алесь: ) "Канешне, можа. Цяпер не такі час, што капелюшы зрываюць".

(Карэспандэнтка: ) "А у Вас ёсьць знаёмыя міліцыянты?"

(Алесь: ) "Мой зяць міліцыянт. Зарабляе ж болей за нас, рабочых на заводах. Цяпер жа ім добра плацяць".

А вось дзяўчына Каця ня здолела адшукаць добрых словаў на адрас беларускіх міліцыянтаў нават у дзень іх прафэсійнага сьвята:

(Каця: ) "Лічаць сябе лепшымі за ўсіх і хочуць нас прынізіць. Я проста працавала... Міліцыянты павінны былі нас абараняць, а на самой справе ў самы патрэбны момант яны зьбеглі".

Некаторыя апытаныя параўноўвалі цяперашнюю міліцыю з той, што была раней. Гаворыць падаткавая інспэктарка Натальля:

(Натальля: ) "Мой бацька быў міліцыянтам. І раней мы былі больш абароненыя. Цяпер я не спадзяюся на міліцыю. Як грамадзянка, я неабароненая".

Сёньня мне давялося паразмаўляць і з самімі міліцыянтамі. Адзін зь іх, старшына міліцыі Маскоўскага райаддзелу Валер Данільчык шчыра прызнаўся:

(Данільчык: ) "З-за нашай працы часам даводзіцца рабіць людзям дрэнна — штрафы й гэтак далей. І таму звычайна людзі гавораць пра міліцыю не зусім добра, дрэнна гавораць".

(Карэспандэнтка: )"Але ж Вы выбралі гэтую прафэсію..."

(Данільчык: ) "Таму што мне падабаецца мая праца".

І ўсё ж, ці адчуваюць беларусы сябя абароненымі ў сваёй краіне?

(Спадар: ) "Ні ў якім разе не адчуваю".

(Другі спадар: ) "Яны змагаюцца з апазыцыяй, а не з бандытамі".


XS
SM
MD
LG