Лінкі ўнівэрсальнага доступу

УЛАДЗІСЛАЎ ЗАВАЛЬНЮК АТРЫМАЎ БЛАСЛАЎЛЕНЬНЕ ПАПЫ РЫМСКАГА НА АДНАЎЛЕНЬНЕ ПРАГРАМЫ “ГОЛАС ДУШЫ”


Галіна Абакунчык, Менск

Падчас нядзельнага набажэнства Ўладзіслаў Завальнюк яшчэ раз парадаваў вернікаў, падмацаваўшы фактамі сваю ранейшую заяву, што “Голас душы” неўзабаве ізноў загучыць у радыёэфіры. Духоўную падтрымку ў справе вяртаньня праграмы ксёндз-пробашч атрымаў ад Папы Рымскага Яна Паўла ІІ падчас свайго нядаўняга візыту ў Ватыкан. Гаворыць Уладзіслаў Завальнюк:

(Завальнюк: ) “Тыдзень таму меў магчымасьць быць у Ватыкане. Была сустрэча з Айцом Сьвятым, таксама на Радыё Ватыкан. Гэты мой пабыт у Рыме многа спрыяе добраму. У Ватыкане гэта канкрэтна сказана было: вам пакуль што не магу выказаць усё, бо гэта сакрэт. Але так, як я й гаварыў, сапраўды “Голас душы” будзе”.

Паводле словаў Завальнюка, для гэтага цяпер зьбіраюцца патрэбныя дакумэнты, а 18 лютага ў Міністэрстве інфармацыі адбудуцца адмысловыя перамовы. Кіраўніца галоўнага аналітычнага ўпраўленьня Міністэрства інфармацыі Натальля Аляшковіч нічога пэўнага ў гэтай справе паведаміць не змагла.

(Аляшковіч: ) “Ёсьць дамоўленасьць, што гэтае пытаньне будзе вырашанае. Больш нічога не магу дадаць”.

Тым часам вернікі працягваюць акцыю пратэсту. З часу закрыцьця праграмы яны не спыняюць збор подпісаў да кіраўніцтва радыё і ўраду Беларусі пад зваротам наступнага зьместу: “Мы, грамадзяне Беларусі, заяўляем пратэст супраць закрыцьця на дзяржаўным радыё высокадухоўнай перадачы “Голас душы”. Гэта ёсьць дыскрымінацыяй вернікаў і ўсіх канфэсіяў Беларусі, парушэньнем нашых грамадзянскіх і канстутыцыйных правоў. Патрабуем неадкладна аднавіць радыёперадачу “Голас душы”.

(Мужчына: ) “Ня просім, а патрабуем. Хопіць прасіць”.

(Жанчына: ) “Гэта ж ясна, што сатана наступ робіць”.

(Іншая: ) “Вось менавіта. Адзін. З вусамі”.

(Мужчына: ) “Вялікдзень забраў і ў каталікоў, і ў праваслаўных — і ўсе маўчалі”.

(Жанчына: ) “Усё, мову адабралі. Як маёмасьць у 17-м годзе адбіралі”.

(Карэспандэнтка: ) “Але ж а 8.30 у нядзелю ёсьць таксама духоўная праграма”.

(Мужчына: ) “Я лічу, што ўлады робяць невялічкі крок назад, каб паглядзець, што мы будзем рабіць. А мы павінны патрабаваць вярнуць ранейшую праграму. Яна сем гадоў гучала”.

(Жанчына: ) “Людзі настолькі ахвотна падпісваюцца, што мы й не чакалі. Мы сабралі каля 30 тысяч подпісаў. Бо ўсе сумленныя людзі разумеюць, што цяпер адбываецца: народ пазбавілі ўсяго. Народ настолькі зьбяднелы, але яшчэ й духоўнага пазбаўляюць”.

Цяпер ад уладных чыноўнікаў залежыць ня толькі лёс “Голасу душы”, але й міжнародны імідж Беларусі: у выпадку забароны каталіцкай радыёперадачы спадзяваньняў на візыт у Беларусь Папы Рымскага ў хрысьціянаў краіны, напэўна, стане яшчэ менш.
XS
SM
MD
LG