Лінкі ўнівэрсальнага доступу

КВАСЬНЕЎСКІ РАЗМАЎЛЯЎ З ПУЦІНЫМ ПРА БЕЛАРУСЬ


Аляксей Дзікавіцкі, Варшава

Аб гэтым Аляксандар Квасьнеўскі ўпершыню заявіў сёньня раніцай у інтэрвію польскаму радыё Zet. З гэтага інтэрвію вынікае, што сытуацыю ў Беларусі прэзыдэнты Пуцін і Квасьнеўскі абмеркавалі ўжо ў першыя гадзіны перамоваў.

Аднак учора й пазаўчора асобы, суправаджаючыя Аляксандра Квасьнеўскага падчас перамоваў, адмаўляліся пацьвердзіць сам факт размовы прэзыдэнтаў пра ліст ад жонак зьніклых беларускіх палітыкаў.

Сёньня падчас інтэрвію карэспандэнтка радыё Zet запытала ў Аляксандра Квасьнеўскага, якое стаўленьне да беларускай апазыцыі ў расейскага прэзыдэнта?

(Квасьнеўскі: ) “Ёсьць вялікае хваляваньне. Напэўна, Беларусь застаецца істотным партнэрам, аднак я ўсьведамляю, што Аляксандар Лукашэнка – партнэр надзвычай ня лёгкі”.

На пытаньне, ці ўсе ж лічыць Пуцін Лукашэнку дыктатарам, Аляксандар Квасьнеўскі наўпрост адказаў наступнае:

(Квасьнеўскі: ) “Не, такія словы не ўжываюцца ў палітычнай размове. Затое, напэўна, я лічу Лукашэнку калегам, зь якім ня лёгка супрацоўнічаць. Але ліст жонак беларускіх апазыцыянэраў, якія зьніклі, якія загінулі, быў перададзены і спадзяюся, што скарыстоўваючы свае магчымасьці, прэзыдэнт Пуцін высьветліць гэтае пытаньне”.

Такім чынам з адказаў прэзыдэнта Квасьнеўскага можна меркаваць, што ніякага канкрэтнага сумеснага рашэньня ў справе звароту жонак зьніклых палітыкаў кіраўнікі Расеі і Польшчы не прыймалі. Аднак, напэўна, станоўчым бокам ёсьць тое, што гэтая справа была абмеркаваная на такім высокім узроўні, як яшчэ напярэдадні абяцалі зрабіць прадстаўнікі адміністрацыі прэзыдэнта Польшчы.
XS
SM
MD
LG