Лінкі ўнівэрсальнага доступу

БНФ "АДРАДЖЭНЬНЕ" РАСПРАЦОЎВАЕ ПАЛІТЫЧНУЮ ТАКТЫКУ НАПЯРЭДАДНІ СВАЙГО ЗЬЕЗДУ


Ігар Карней, Менск

Лідэр БНФ "Адраджэньне" Вінцук Вячорка мяркуе, што гэта перадапошні напярэдадні зьезду сойм, які павінен акрэсьліць этапы палітычнай актыўнасьці фронту як на кароткую, так і на доўгатэрміновую пэрспэктыву.

(Вячорка:) "Закончыўся вельмі важны этап — прэзыдэнцкая кампанія, але разгойдваццца надта доўга нельга, трэба рыхтавацца да наступнай палітычнай кампаніі. Ужо праведзеныя адпаведныя экспэртныя абмеркаваньні і мазгавыя штурмы. Цяпер адбываюцца рэгіянальныя сходы фронтаўскіх арганізацыяў для вылучэньня дэлегатаў на зьезд і адначасова дзеля сустрэчы з кіраўніцтвам арганізацыі. Гэта дазваляе абмеркаваць усе вострыя пытаньні прамінулай кампаніі, а таксама нашага каротка- і сярэднетэрміновага плянаваньня непасрэдна з людзьмі — тымі актывістамі, зь якімі нам працаваць надалей".

(Карэспандэнт:) "Колькі сябраў фронту будзе браць удзел у зьезьдзе?"

(Вячорка: ) "Каля 450 чалавек."

(Карэспандэнт:) "Пытаньне адносна кіраўніка руху пасьля зьезду. Якія будуць асабіста вашы захады?"

(Вячорка:) "Я ўжо кансультаваўся з сябрамі, аднадумцамі і маю намер балятавацца на пасаду старшыні фронту. А таксама настойваць на захаваньні той каманды, якая ажыцьцяўляла кіраўніцтва фронтам цягам апошніх двух гадоў. У нас ёсьць выразная, ясная праграма пераўтварэньня фронту ў сучасную дынамічную партыю, якая, маючы цьвёрдыя ідэйныя падставы, разам з тым валодае сучаснымі мэтодыкамі працы з людзьмі."

Намесьнік старшыні БНФ Юры Хадыка таксама надае сёньняшняму сойму вялікае значэньне. Ён кажа, што ад выпрацаваных зараз рашэньняў залежыць месца фронту ў палітычным жыцьці краіны.

(Хадыка:) "Зразумела, да зьезду мы мусім падыйсьці падрыхтаваныя, агульная назва сёньняшнята сойму — "Палітычная сытуацыя ў краіне". Асноўныя пытаньні — гэта абмеркаваньне нашых тактычных плянаў, у прыватнасьці, стаўленьне да мясцовых выбараў 2003 году альбо магчымых так званых саюзных. Будуць разглядацца варыянты супрацоўніцтва зь іншымі дэмакрытычнымі структурамі".

(Карэспандэнт:) "Ці будзе больш акрэсьленая сытуацыя па Курапатах?"

(Хадыка:) "Натуральна, пытаньне будзе абявязкова разглядацца. Адназначна, сытуацыя ў Курапатах зараз не зусім нармальная. На маю думку, павінен быць зьменены фармат абароны Курапатаў. Дарога пракладаецца, павярнуць назад яе немагчыма, але магчыма ў выніку перамоваў зь дзяржаўнымі структурамі дабіцца абяцаньняў заняцца добраўпарадкаваньнем ўрочышча. І калі ўдасца падпісаць такое пагадненьне, я мяркую, трэба спыніць начаваньне маладых людзей у халодных умовах, якое рызыкуе ўскладненьнем здароўя ды іншымі небясьпечнымі наступствамі."

Зрэшты, пытаньне адносна Курапатаў можа застацца адным з самых вострых і надалей для БНФ. Нават у кіраўніцтве Фронту па-рознаму ставяцца да пэрспэктывы існаваньня лягеру абаронцаў урочышча і мэтазгоднасьці перамоваў з уладамі. Закрыцьцё ж гарадзенскай газэты "Пагоня" сябры Сойму адназначна разглядаюць як палітычную замову кіраўніцтва краіны.

XS
SM
MD
LG