Лінкі ўнівэрсальнага доступу

СЁНЬНЯ АДНУ СПРАВУ СУПРАЦЬ АБАРОНЦАЎ КУРАПАТАЎ СУД СПЫНІЎ, АСТАТНІХ ШТРАФУЮЦЬ


Любоў Лунёва, Менск

Судзьдзя Руслан Казадаеў спыніў справу супраць студэнткі Эўрапейскага Гуманітарнага Ўнівэрсытэту Ірыны Кашталік. Падставай для такога рашэньня сталі хлусьлівыя паказаньні супрацоўнікаў міліцыі Савецкага раёна Івана Дулупа й Міколы Клевады. У судзе высьветлілася, што насамрэч гэтыя міліцыянты не затрымлівалі Ірыну Кашталік, а толькі пісалі пратаколы паводле загаду кіраўніцтва.

Мікола Клевада наагул не пазнаў Ірыну сярод прысутных у судовай залі. А Іван Дулуп пасьля некалькіх пытаньняў судзьдзі пачаў блытацца ў сьведчаньнях, грубіць адвакату і спрачацца з судзьдзёй. Адвакат у сувязі з гэтым папрасіў суддзю напісаць на Івана Дулупа і Міколу Кляваду адпаведнае прадстаўленьне ў гарадзскую міліцыю. Гаворыць Ірына Кашталік:

(Кашталік: ) "Што я магу казаць пра дзеяньні супрацоўнікаў міліцыі, калі яны цалкам фальсыфікуюць справу, калі я зь імі знаёмлюся толькі ў пастарунку, і іх нават лепей памятаю чымся яны мяне. А яны сьцвярджаюць, што яны быццам мяне затрымлівалі, быццам я супраціўлялася. І нават дзеля таго, каб намаляваць больш яскравую карціну яны кідалася на падлогу. А тое як ён сябе паводзіў у судзе сьведчыць пра ягоны культурны ўзровень. Трэба было бы ўвесьці артыкул за нецэнзурныя выказваньні з боку міліцыянтаў".

Алесь Цялегін за абарону Курапатаў аштрафаны на 10 мінімальных заробкаў. Выказваньне міліцыянтаў пра тое, што Алесь падчас затрыманьня супраціўляўся ім, выклікала рогат сярод прысутных. Справа ў тым, што Алесь Цялегін, вядомы таксама, як Алесь Гетман, зьяўляецца віцэ-прэзыдэнтам Беларускай фэдэрацыі ў кантактным каратэ. Ён пракамэнтаваў судовы прысуд Радыё Свабода:

(Гетман: ) "Я лічу, што гэта несправядлівы прысуд. Судзьдзя сам нічога не вырашае, а рашэньне ідзе "зьверху". Насамрэч тут адбываецца не суд, а судзілішча люду. Я віцэ-прэзыдэнт Беларускай фэдэрацыі кантактнага каратэ. Калі б я насамрэч аказваў супраціў работнікам міліцыі, калі б я сапраўды аказваў супраціў міліцыянтам, то гэта ўжо была б не адміністрацыйная, а крымінальная справа; яны былі бы пакалечаныя на самой справе".

Юрася Фабішэўскага, сябра моладзевага руху "Зубр", судзьдзя Аксана Рэлява аштрафавала на шэсьць мінімальных заробкаў. Валер Буйвал аштрафаваны на трыццаць мінімальных заробкаў.

У адміністрацыйных справах Андрэя Ягорава, Яўгена Афнагеля, Яраслава Сьцешыка, Рамана Казакевіча, Мікіты Сасіма, Уладзіслава Валадзько, Веранікі Купчанкі, Міколы Ткачэнкі і Генадзя Дранковіча прысуды вынясуць на наступным тыдні.

Суды над затрыманымі абаронцамі Курапатаў зацягнуліся па віне супрацоўнікаў міліцыі, якія ігнаруюць позвы ў суд.

XS
SM
MD
LG