Лінкі ўнівэрсальнага доступу

НА АДНЫМ З ГОМЕЛЬСКІХ ЗАВОДАЎ СЬПЕЮЦЬ МАСАВЫЯ ПРАТЭСТЫ


Казімер Яноўскі, Гомель

Паводле інфармацыі старшыні прафкаму заводу пускавых рухавікоў Аляксандра Кізёва, абурэньне калектыву выклікаюць найперш працяглыя нявыплаты заробку. Толькі нядаўна, пасьля прынятага звароту да Аляксандра Лукашэнкі, да кіраўніка ўраду Генадзя Навіцкага, а таксама да Фэдэрацыі прафсаюзаў і Гомельскага аблвыканкаму, адміністрацыя прадпрыемства змагла разьлічыцца з рабочымі за жнівень.

У той жа час запазычанасьць за верасень складае 75 мільёнаў рублёў. Праз два дні дырэкцыя ўжо павінна выплачваць заробак і за кастрычнік, што цалкам нерэальна. У людзей болей няма цярпеньня чакаць. Яны ня могуць як сьлед карміць дзяцей, ня могуць купіць ім да зімы цёплую вопратку.

Трывожыць калектыў і тое, што з прыходам на завод дырэктара Міхаіла Кандраценкі адміністрацыя не шукае годнага выйсьця зь фінансавага крызысу, а ідзе шляхам найменшага супраціву. Рыхтуецца чарговае звальненьне яшчэ 100 працоўных, што складае 10% ад агульнай колькасьці. Прычым адміністрацыя пайшла на хітрыкі.

Карыстаючыся артыкулам 32-м Працоўнага кодэксу пра мажлівасьць пераводу рабочых на аплату на палову стаўкі ў сувязі з цяжкім эканамічным станам, адміністрацыя вымушае людзей звальняцца нібыта паводле асабістага жаданьня. У гэткім выпадку людзі ня маюць права нават на атрыманьне 3-месячнай грашовай кампэнсацыі.

Менавіта гэтае пытаньне, а таксама праблема з выплатамі заробку сталіся прадметам сёньняшніх перамоваў адміністрацыі з прафкамам пры ўдзеле вялікай колькасьці рабочых.

Працоўныя настойваюць на прыезьдзе кампэтэнтнай камісіі, якая б разабралася, чаму пры росьце аб'ёмаў вытворчасьці завод патрапіў у такое цяжкое фінансавае становішча. Інакш калектыву не застаецца нічога іншага як адстойваць свае законныя патрабаваньні праз масавыя акцыі пратэсту. Ва ўсялякім разе, гэтак сказана ў звароце калектыву заводу пускавых рухавікоў да найвышэйшых дзяржаўных асобаў.

XS
SM
MD
LG