Лінкі ўнівэрсальнага доступу

АНАТОЛЬ ЛЯБЕДЗЬКА СУДЗІЦЦА ЗЬ ЮРЫЕМ АЗАРОНКАМ І БЕЛАРУСКІМ ТЭЛЕБАЧАНЬНЕМ


Альгерд Невяроўскі, Менск

У адной са сваіх тэлепраграмаў, што выйшла сёлета ў сакавіку, Юры Азаронак сьцьвярджаў, што Анатоль Лябедзька прывёз з Польшчы ў Беларусь 10 000 даляраў, якія быццам атрымаў ад заходніх грантадаўцаў на апазыцыйную дзейнасьць. Пры гэтым, паводле Азаронка, 8 500 даляраў з гэтай сумы спадар Лябедзька забраў сабе.

Лідэр АГП палічыў, што гэтая інфармацыя абражае ягоныя гонар, годнасьць і дзелавую рэпутацыю ды падаў на Юрыя Азаронка й БТ пазоў у суд, патрабуючы абвергнуць хлусьлівую інфармацыю ды спагнаць з адказчыкаў як кампэнсацыю за маральныя страты 15 мільёнаў рублёў (паводле цяперашняга курсу гэта 10 000 даляраў).

Пазоў пададзены яшчэ паўгода таму, але да разгляду ў судзе яго прынялі толькі пасьля прэзыдэнцкіх выбараў. Першае судовае паседжаньне перанесьлі — яно фактычна не пачалося, бо Азаронак у той час быў за межамі Беларусі.

Не зьявіўся Юры Азаронак у суд і сёньня. Ён толькі перадаў праз свайго прадстаўніка Генадзя Апанасенку заяву з просьбай праводзіць разгляд справы безь яго. Суд прыслухаўся да просьбы Азаронка, і судзьдзя Алена Ананіч пачала разгляд справы.

Анатоль Лябедзька адразу ж заявіў, што сваю невінаватасьць ён даказваць ня мусіць (гэта справа адказчыкаў). Праўда, пасьля ён дадаў, што ні празь беларуска-польскую, ні праз тайляндзка-бірманскую, ні празь якую іншую мяжу сумаў, названых Азаронкам, ніколі не вазіў.

Юрыст БТ заявіў, што на тэлебачаньні не захаваўся запіс той праграмы, бо з прычыны недахопу касэтаў запісаныя праграмы нібыта захоўваюцца ў архіве ня больш за месяц. Анатоль Лябедзька падаў суду сваю касэту з запісам праграмы. Пасьля прагляду ў судзе гэтай касэты юрыст БТ адразу ж заявіў, што разгляд справы трэба адкласьці й выклікаць у суд самога Юрыя Азаронка. Маўляў, пры цяперашніх тэхнічных магчымасьцях можна зрабіць любы відэамантаж.

Анатоль Лябедзька і ягоны прадстаўнік Яўген Лабановіч спрабавалі давесьці, што ніякай патрэбы выклікаць у суд сп. Азаронка няма, бо ён жа сам папрасіў разглядаць справу безь яго, але безвынікова. Судзьдзя Алена Ананіч задаволіла хадайніцтва прадстаўніка БТ. Гаворыць Анатоль Лябедзька:

(Лябедзька: ) "Я шкадую, што ў нас няма сапраўднай судовай сыстэмы. Сёньня былі ўсе доказы таго, што Беларускае тэлебачаньне хлусіць, што яно выкарыстоўвае прыёмы часоў Гебэльса. Сёньня прадстаўнік БТ проста разводзіў рукамі. У яго не было абсалютна ніякіх доказаў тых абвінавачаньняў, якія былі прад'яўленыя мне празь Белтэлерадыёкампанію".

Судовае паседжаньне перанесьлі на няпэўны час, але лідэр АГП спадзяецца выйграць гэтую справу.


XS
SM
MD
LG