Лінкі ўнівэрсальнага доступу

СЁНЬНЯ Ў КУРАПАТЫ НАВЕДАЛІСЯ ЛЮДЗІ КРЫМІНАЛЬНАГА ВЫГЛЯДУ


Радыё Свабода.

(Соусь: ) “Ноч у Курапатах прайшла даволі спакой, раніца таксама. Затое паменела валанцёраў, якія нясуць варту ў Курапатах. Уначы тут было чатыры чалавекі, а калі я ўдзень прыехала ў Курапаты, тут ля вогнішча сядзеў толькі адзін сябра руху Зубар. Пазьней ізноў пачалі прыходзіць людзі, і цяпер тут каля 10 чалавек.

Адметна, што ўдзень некалькі гадзінаў над Курапатамі кружыў гелікоптэр, часам вельмі нізка – у 10 мэтрах над зямлёй. Некаторыя з валанцёраў мяркуюць, што гэта ёсьць спроба запалохаць абаронцаў Курапатаў. Апрача таго я была сьведкай вельмі дзіўнага візыту. Дзесьці а 14-й гадзіне сюды пад’ехалі хлопцы ў скуранках і залатых ланцугах. Яны пачалі распытваць, колькі грошай атрымліваюць валанцёры за тое, што знаходзяцца тут, цікавіліся, ці беларусы ляжаць у гэтых магілах, а можа – габрэі? Наогул, паводзілі сябе вельмі нахабна. А потым паведамілі, што хутка сюды прыедуць амонаўцы і ўсіх разгоняць. Некаторыя абаронцы мяркуюць, што гэта быў невыпадковы візыт, бо каб выкінуць адсюль людзей, уладам неабавязкова зьвяртацца да АМОНу – можна зьвярнуцца па дапамогу да крымінальных структураў. Дарэчы, тут згадваюць пра выказваньні Лукашэнкі ў Гомелі, калі ён казаў пра шчыльныя стасункі паміж уладамі і крымінальнікамі.

Дарэчы, сёньня 29 кастрычніка. У гэты дзень у 1937 годзе ў Курапатах пачаліся масавыя расстрэлы беларускай інтэлігенцыі. У гэты дзень быў забіты і Браніслаў Тарашкевіч. Побач са мной сябар КХП БНФ Уладзімер Юхо”.

(Юхо: ) “Раней тут выступалі і Ніл Гілевіч, і Васіль Быкаў, і Генадзь Бураўкін. Таму і зараз, калі будаўнічая тэхніка падыйшла зусім блізка да Курапатаў, трэба, каб інтэлігенцыя ўзьняла свой голас і каб ён быў пачуты. Аб Курапатах сёньня ведае ўвесь сьвет, і толькі беларускія ўлады нічога ня хочуць чуць і хочуць руйнаваць помнік”.

(Соусь: ) “Вось толькі што зноў пралятаў гелікоптэр…Хачу таксама нагадаць, што заўтра, 30 кастрычніка, ва ўсім сьвеце паводле рашэньня ААН будзе адзначацца сусьветны дзень памяці ахвяраў палітычных рэпрэсіяў. У Беларусі сёлета ўпершыню пад эгідай Грамадзкай ініцыятывы “За выратаваньне мэмарыялу Курапаты” пройдзе тыдзень памяці дзеля ўшанаваньня ахвяраў палітычных рэпрэсіяў”.


XS
SM
MD
LG