Лінкі ўнівэрсальнага доступу

НАВАГРАДЗКІ ЗАВОД ХОЧА Ў “ГАЗПРОМ”


Сяргей Астраўцоў, Наваградак

Адкрытае акцыянэрнае таварыства "Наваградзкі завод газавай апаратуры" — гэта падмурак, на якім трымаецца бюджэт раёну. Яшчэ нядаўна завод забясьпечваў амаль палову бюджэту. Цяпер ягоная доля зьменшылася да 30%. Але з выплатай падаткаў узьніклі праблемы. Завод атрымаў практычна напалову меней прыбыткаў, чым летась, здарыўся раённы бюджэтны крызыс.

Згодна з плянавай эканомікай, у кожным наступным годзе прадпрыемства павінна выпусьціць больш прадукцыі, чым у папярэднім. Ва ўладаў не паўстае пытаньня пра тое, ці будзе тая прадукцыя прададзеная. Так адбылося і ў гэтым разе. Улады заплянавалі павелічэньне выпуску газавай апаратуры і, адпаведна, павялічылі бюджэтныя лічбы. У выніку атрымалася, што акцыянэрнае таварыства не даплаціла ў бюджэт 1 мільярд рублёў.

Арыентавалася яно дагэтуль на расейскіх пастаўшчыкоў і рынак. Але ў Расеі падаражэў газ, адразу рэзка зьменшыўся попыт на газабалённыя сыстэмы для аўтатранспарту. Для мікрааўтобусаў "Газэль", напрыклад, удвая. Таксама падвысіліся кошты на сыравіну й дэталі. У выніку на складах застаўся месячны выпуск прадукцыі коштам больш за 1 мільярд рублёў. Прадукцыя зрабілася стратнай.

Тады канцэрн "Белпалівагаз" падвысіў цэны на наваградзкія вырабы, каб ад продажу мець прыбытак. Але хто іх купіць? Вырашылі шукаць пакупнікоў у суседняй Украіне і ў няблізкай Сярэдняй Азіі ды зьмяншаць энэрга- і мэталаёмістасьць. А пакуль на прадпрыемстве 3-дзённы працоўны тыдзень, і сярод рабочых зьявіліся чуткі аб скарачэньнях.

Старшыня райвыканкаму Анатоль Ліс параіў "глядзець у пэрспэктыву". А дзеля гэтага прадумаць, як перадаць частку акцыяў расейскаму "Газпраму". Дырэктар заводу Аляксандар Фядотаў пагадзіўся з парадай. 5 гадоў таму Аляксандар Лукашэнка быў на прадпрыемстве і падтрымаў плян хаўрусу з "Газпрамам". Аднак тады, маўляў, урадавыя чыноўнікі ўсё зьвялі на нішто. Дырэктар лічыць, што варта паспрабаваць яшчэ раз. Шукаць іншых інвэстараў наваградцы не зьбіраюцца.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG