Лінкі ўнівэрсальнага доступу

logo-print

ПЯТНІЧНАЕ АБРАБАВАНЬНЕ МАЦІ ЮР’Я ЗАХАРАНКІ НЕ БЫЛО ПЕРШЫМ


Казімер Яноўскі, Гомельская вобласьць

Невядомыя злодзеі ўжо ня першы раз рабуюць гаспадарку Ўльяны Захаранкі. Літаральна месяц таму нехта ноччу залез да яе ў хляўчук і скраў з аўтапрычэпа сына тры колы, у тым ліку і запасное.

Мясцовыя міліцыянты пра гэта даведаліся толькі зараз, калі злодзей праз вакно забраўся ў хату і выцягнуў рэчы Юр'я Захаранкі.

Опэрупаўнаважаны Васілевіцкага аддзяленьня Рэчыцкай міліцыі, старэйшы лейтэнант Анатоль Новік ня стаў камэнтаваць выпадак з аўтапрычэпам — папросту ня ведаў, а вось наконт крадзяжу курткі і спартовых гарнітураў заўважыў, што крадзеж загадкавы.

(Новік: ) "Тут больш каштоўнага не ўзялі. Менавіта тое, што можна было ўзяць злодзеям — дублёнку, напрыклад. Схапілі менш каштоўнае", — кажа спадар Новік.

За трое сутак міліцыянты ня здолелі знайсьці ні рэчаў Юр'я Захаранкі, ні злодзея. Сёньня Анатоль Новік толькі й змог паведаміць, што з прычыны крадзяжу распачалі крымінальную справу паводле артыкулу 205, часткі 3 — крадзеж з пранікненьнем у жытло. Пакараньне за гэта ад 5 да 10 гадоў пазбаўленьня волі.

Пра матывы крадзяжу міліцыянты гаварыць ня хочуць. Аднак можна меркаваць, што дом прыцягваў рабаўнікоў з прычыны таго, што Ўльяну Захаранку ў вайну забралі на прымусовыя працы ў фашыстоўскую Нямеччыну. Цалкам магчыма, што нехта паквапіўся на выплачаную нямецкім бокам кампэнсацыю, хаця гаспадыня даўно купіла за маркі капы на старэнькія крэслы і канапу.

Яшчэ больш верагоднай зьяўляецца повязь крадзяжу зь перадачамі Беларускага тэлебачаньня і публічнымі заявамі найвышэйшых кіраўнікоў дзяржавы, якія абвінавачвалі экс-міністра ў фінансавых махінацыях. Відаць, злодзей і паддаўся на прапаганду.

Праўда, маці турбуецца не пра мітычныя грошы, а пра лёс сына. Распавядае Ўльяна Захаранка:

(Захаранка: ) "Пісала я Лукашэнку пісьмо, прасіла і плакала, што я адзінокая, што я знаю, што вы шмат гаворыце, што мой сын абакраў некага… Няма ў мяне нідзе нічога, апроч анучаў. Стулікі прыкрыла анучамі, бо яны драныя", — кажа маці зьніклага генэрала Юр'я Захаранкі.


XS
SM
MD
LG