Лінкі ўнівэрсальнага доступу

МЕНЧУКІ ПРА НЕБЯСЬПЕКУ ТЭРАРЫЗМУ Ў БЕЛАРУСІ


Ягор Маёрчык, Менск

Бальшыня выпадковых мінакоў падтрымлівае ваенную апэрацыю на тэрыторыі Афганістану. Адзінае, што многіх непакоіць — гэта магчымыя ахвяры сярод цывільнага насельніцтва.

Прыкладна палова апытаных мяркуюць, што нядаўна распачатая вайна — не нагода для падвышэньня мераў бясьпекі ў Беларусі. Маўляў, Афганістан ад нас далёка, і Беларусь гэта не закране. Аднак некаторыя перакананыя, што пільнасьць у гэтай справе не перашкодзіць.

(Спадар: ) "Натуральна, трэба глядзець на прадпрыемствы, якія ўяўляюць небясьпеку".

(Карэспандэнт: ) "Ці трэба ў Беларусі падвышаць меры бясьпекі?"

(Спадарыня: ) "Трэба!"

(Карэспандэнт: ) "А якім чынам?"

(Спадарыня: ) "Мабыць, кампэтэнтныя органы павінны вырашыць, што трэба рабіць".

(Спадар: ) "Мяркую, што абавязкова трэба ўзмацніць ахову аб'ектаў".

Бальшыня мінакоў лічыць, што тэрарыстычныя акты ў Беларусі магчымыя:

(Спадарыня: ) "Ад гэтага ніхто не застрахаваны. Тэрарызм непрадказальны. Таму сказаць, што гэтага ў нас ніколі ня будзе — так сказаць ніхто ня можа".

(Спадарыня: ) "Амэрыка пачувала сябе вельмі добра. Але вось як атрымалася. Дык чаму ў Беларусі ня можа такога быць?"

(Спадар: ) "Тэрарызм, як кажуць, — без нацыянальнасьцяў і межаў. Таму гэта цалкам верагодна. Усё можа быць. Тым больш, у нас шмат незадаволеных".

(Спадар: ) "Можа быць, бо дурняў паўсюль хапае".

(Спадар: ) "Сваіх трэба тэрарыстаў прыбіраць".

(Карэспандэнт: ) "А хто гэта — нашы тэрарысты?"

(Спадар: ) "А гэта вам вядома".

Як людзі ставяцца да таго, што адным з наступстваў баявых дзеяньняў у Афганістане стане новая хваля нелегальнай міграцыі, якая здольная дасягнуць і беларускіх межаў?

(Спадар: ) "Уцякачы ў Беларусі магчымыя. І калі вайна будзе доўгай, то ўцекачы абавязкова будуць у Беларусі".

(Спадар: ) "Гэта магчыма. І вельмі страшна гэта. Асабіста мяне гэта непакоіць".

(Спадарыня: ) "Дык ужо пачалася міграцыя. Куча гэтых усялякіх замежнікаў у нас".

(Спадар: ) "Размова ідзе пра ўцекачоў. Яны могуць быць. Вось з Таджыкістану ў нас шмат. Іх, вядома, трэба выдаляць зь Беларусі і не пускаць сюды, таму што ў нас сваіх хапае жабракоў па пад'ездах".

(Спадарыня: ) "Мне падаецца, што калі зьявяцца ўцекачы, нават закрытая мяжа не дапаможа пазьбегнуць гэтага".

Уцекачы могуць трапіць у Беларусь праз адкрытую мяжу з Расеяй. Ці варта ўзяць яе пад кантроль, пачаць патруляваньне памежных раёнаў? Некаторыя мінакі лічаць, што гэта зрабіць неабходна.

(Спадарыня: ) "Што мы — да такой ступені багатая краіна, каб іх утрымліваць? Дык вось, калі мы закрыем мяжу, яны да нас ня трапяць, нам не трэба будзе іх утрымліваць".

(Карэспандэнт: ) "Ці трэба закрыць мяжу з Расеяй?"

(Спадарыня: ) "Калі будзе пагроза вялікай колькасьці эмігрантаў, то яе трэба закрыць".

(Спадар: ) "Мяжа ёсьць мяжа. Яна павінна быць на замку!"
XS
SM
MD
LG