Лінкі ўнівэрсальнага доступу

“ПРЭЗЫДЭНТ І ЯГО ДЫЯГНАЗ”


Вячаслаў Ракіцкі, Прага

Вадзім Дубноў цытуе Лукашэнку, які, галасуючы на сваім выбарчым участку, на пытаньне журналістаў, ці мае ён намер памяняць канстытуцыю, каб балятавацца яшчэ на адзін тэрмін, наўпрост адказаў: “А хто вам сказаў, што гэта мой апошні тэрмін?”

На думку расейскага публіцыста, “ніхто, натуральна, такога ў Беларусі ня скажа. Толькі падобна, што цяжкасьці непераадольнага характару могуць пачацца і раней, чым прз пяць гадоў. МАЗ, БЕЛАЗ і іншыя гіганты саціндустрыі адсоткаў трыццаць сваёй прадукцыі накіроўваюць адразу на склад, а астатняе ідзе ў асноўным у Расею або па бартэры, або па цане ніжэй за сабекошт, і на заробак заводы бяруць крэдыты ў Нацбанку, а бартэр у Расеі пакрысе канчаецца. Калгасы, як лічаць беларускія эканамісты, канчаткова мінулі кропку звароту, адраджэньню ўжо не падлягаюць, і ў якасьці пачатку беларускага паратунку некаторыя зь іх ужо прапануюць адмовіцца ад паслугаў свайго аграпраму і цалкам купляць харчаваньне за мяжой”.

“Інвэстыцыяў няма, – працягвае свой аналіз будучыні кіраванай Лукашэнкам Беларусі Вадзім Дубноў, – і непрызнаньне выбараў АБСЭ на гэтай тэме ставіць, здаецца, канчатковы крыж. Карэйцы, якія пажадалі купіць тэлевізійны завод “Гарызонт”, у адказ на прапанову ўзяць у нагрузку практычна мёртвую вытворчасьць інтэгральных схемаў, усьміхнуліся і зьехалі. Іншых прапановаў ва ўлады для інвэстараў няма. Ёсьць нязьменнае патрабаваньне: калі купляць, дык толькі са шпіталямі, сталоўкамі і дзіцячымі садкамі".

Аўтар “Нового времені” задаецца тым самым пытаньнем, якое трывожыць шмат каго і ў Беларусі пасьля таго, як Лукашэнка распачаў новую пяцігодку свайго прэзыдэнцтва: “Ці здольны ён памяняцца?” І адказвае: “Аб’ектыўна атрымліваецца, што – не.” Спасылаючыся на шырокавядомы дыягназ, пастаўлены Лукашэнку псыхіятрам Зьмітром Шчыгельскім, Вадзім Дубноў піша: “Няздольнасьць да перажываньня віны і атрыманьня карысьці зь неспрыяльнага досьведу” дапаўняе натуральнае нежаданьне дзяліцца ўладаю, і гэта зразумела: калі Лукашэнка аддасьць хоць бы частку, ён рызыкуе згубіць усё, а ад бялградзкіх алюзіяў усю прэзыдэнцкую эліту ўжо трасе”.

На думку расейскага аналітыка, “шанцаў на новы манэўр на ўсходзе больш ня бачна. Іх, строга кажучы, не было і раней, таму што распрацоўшчыкаў лукашэнкаўскай нішы ў Расеі было зашмат і безь яго – ад Зюганава да Лебедзя і Лужкова. Цяпер яшчэ горш: нішы гэтай больш няма, як няма і іншых, а былыя яе фаварыты паступова становяцца ў Расеі ўсяго толькі героямі эпізодаў для падручнікаў найноўшай гісторыі”.

І, нарэшце, выснова, да якой прыйшоў расейскі публіцыст і палітоляг Вадзім Дубноў: “Так што ў гэтым сэнсе Лукашэнку наканаваная толькі Беларусь. На пытаньне пра тое, ці доўга Беларусі наканаваны Лукашэнка, людзі, знаёмыя з дыягназам, адказваць не бяруцца. Нават пры тым, што ніякіх шанцаў празь пяць гадоў для яго ня бачаць".


XS
SM
MD
LG