Лінкі ўнівэрсальнага доступу

АКТЫВІСТАЎ УСЯСЬВЕТНАГА ЗГУРТАВАНЬНЯ БЕЛАРУСКІХ ГАБРЭЯЎ ЗАТРЫМАЛІ ЗА ПІКЕТАВАНЬНЕ МЕНГАРВЫКАНКАМУ


Ягор Маёрчык, Менск

Разгляд адміністрацыйнай справы ў судзе перанесьлі на аўторак, бо затрыманыя запатрабавалі адвакатаў.

Сёньня зранку два актывісты Ўсясьветнага згуртаваньня беларускіх габрэяў Якаў Гутман і Ўладзімер Рубінчык выйшлі зь пікетам да будынку Менскага гарадзкога выканаўчага камітэту, што на пляцы Незалежнасьці. Яны трымалі ў руках плякат на беларускай мове: "Разбурэньне храму — разбурэньне сьвету. Людзі! Ратуйце менскую сынагогу на Дзімітрава 3, помнік габрэйскай і беларускай культураў!"

На тым месцы, дзе цяпер знаходзіцца будынак былой габрэйскай сынагогі — помнік архітэктуры ХІХ стагодзьдзя, фірма "Камкон" вырашыла збудаваць жылы дом у цэнтры Менску. Гарадзкія чыноўнікі спачатку дазволілі руйнаваць былы храм, але пазьней Савет Міністраў прыпыніў пастанову Менгарвыканкаму.

Тым часам, ігнаруючы рашэньне ўраду, будаўнікі ў аўторак ужо зьнішчылі на 70% будынак на Дзімітрава, 3.

Якаў Гутман упэўнены, што гэта робіцца з маўклівай згоды гарадзкіх уладаў. А агульную сытуацыю з захаваньнем гістарычнай спадчыны ў Беларусі ён камэнтуе так:

(Гутман: ) "Дзікунства! Ніякі нармальны, больш-менш цівілізаваны чалавек ня рушыць могілкі і ня рушыць храмы. Той, хто ўчора разбурыў сынагогу, заўтра сядзе ў самалёт і паляціць на Вашынгтон, альбо на Менск, альбо на Кіеў. У людзей у галаве ўжо ёсьць імкненьне разбураць, і няма ў душы нічога сьвятога".

Пікетаваньнем спадары Гутман і Рубінчык спрабавалі прыцягнуць увагу чыноўнікаў да сытуацыі, што склалася вакол будынку былой сынагогі. Яны патрабуюць перадаць яго "законным нашчадкам" і прыцягнуць да адказнасьці вінаватых у разбурэньні.

Але замест увагі чыноўнікаў пікетоўцы выклікалі цікавасьць міліцыянтаў у асобе намесьніка начальніка ўправы ўнутраных справаў Маскоўскага РАУС Мікалая Кудзінава.

(Кудзінаў: ) "Ці вы ведаеце, што стаяць з плякатамі — гэта ўжо пікетаваньне? Вы маеце дазвол?"

Дазволу ў спадароў Гутмана і Рубінчыка не было. Падпалкоўнік Кудзінаў прапанаваў іншае месца для пратэсту:

(Кудзінаў: ) "Маглі б паехаць у Пухавічы, альбо Лепель. А тут — ня месца. Гэта рэжымны аб'ект".

Пасьля гэтага актывістаў Усясьветнага згуртаваньня беларускіх габрэяў адвезьлі ў Маскоўскі РАУС, дзе міліцыянты склалі пратаколы пра адміністрацыйнае правапарушэньне.

Якаў Гутман кажа, што ў сытуацыі, калі ўлады парушаюць закон, застаецца адно выйсьце — прыцягнуць увагу міжнароднай супольнасьці да канфлікту вакол будынку па вуліцы Дзімітрава, 3.

XS
SM
MD
LG