Лінкі ўнівэрсальнага доступу

ДА АМЭРЫКАНСКАЙ АМБАСАДЫ Ў МЕНСКУ ПРАЦЯГВАЮЦЬ ІСЬЦІ ЛЮДЗІ


Ганна Соусь, Менск

Людзі зьвяртаюцца да прэзыдэнта Амэрыкі Джорджа Буша, да амбасадара Майкла Козака, узгадваюць сваіх знаёмых альбо сваякоў у Злучаных Штатах.

Ігар Шэсьцярэнь прыйшоў да амэрыканскай амбасады разам з 5-гадовай дачкой Надзейкай.

(Шэсьцярэнь: ) "Там дзеці загінулі... Яны былі і ў самалёце сярод пасажыраў, мабыць і вакол тых будынкаў, якія рухнулі. Жахліва. Калі маеш дзіця, тады найбольш разумееш, што такое жыцьцё, што такое гэты дар — жыць".

Ігар Шэсьцярэнь мяркуе, што тэрарысты павінны адказваць за ўчыненыя злачынствы.

(Шэсьцярэнь: ) "Першая мая думка была — тыя, хто гэта зрабіў і тыя, хто гэта замовіў — ня людзі".

Збольшага людзі, што прыходзяць да амбасады, вітаюць рашэньні амэрыканскіх уладаў пакараць тэрарыстаў. Гаворыць спадарыня Людміла:

(Людміла: ) "Ня будзем далёка хадзіць — зло паўсюль надыходзіць. А цяпер хацелася б гэтае зло перамагчы. Я падтрымліваю Салжаніцына — сьмяротная кара для тых, хто замахваецца на свабоду, на спакойнае жыцьцё ўсяго грамадзтва".

Гэтак жа мяркуе і каардынатар Хартыі-97 Зьміцер Бандарэнка, які таксама сёньня прыйшоў да амэрыканскай амбасады выказаць свае спачуваньні.

(Бандарэнка: ) "Вар'яты і дыктатары будуць перашкаджаць жыць нам усім — і ў Амэрыцы, і ў Беларусі. І з дыктатурамі трэба змагацца. Безумоўна, пэўныя захады будуць рабіць урад Злучаных Штатаў, узброеныя сілы Злучаных Штатаў, юстыцыя ЗША. Адзінае, што ўсе мы павінны разумець: сёньня ў глябальным сьвеце ніхто ня можа быць у бясьпецы, калі ёсьць вар'яты, для якіх жыцьцё чалавека нічога не каштуе".

Зьміцер Бандарэнка згадаў сваю нядаўнюю паездку ў ЗША:

(Бандарэнка: ) "Роўна год таму я знаходзіўся ў Злучаных Штатах і 15 верасьня здымаў на сваю аматарскую відэакамэру гэтыя два будынкі-блізьнюкі. Зараз я праглядаў гэтую касэту, я ў шоку — на здымках гэтыя будынкі засталіся, а на самой справе іх ужо няма".

Практычна ўсе мае суразмоўцы казалі пра тое, што цяпер не адчуваюць сябе ў бясьпецы. Гэтак лічыць спадар Сяргей:

(Сяргей: ) "Пакуль мы ідзем да саюзу з Расеяй, мы не абароненыя, таму што Расея — гэта тэрарызм".

Сяргей мяркуе, што наступствы гэтых тэрарыстычных актаў пакуль непрадказальныя.

(Сяргей: ) "Усё залежыць ад таго, якая будзе рэакцыя Злучаных Штатаў — эмацыйная ці прагматычная. Я за тое, каб была прагматычная, каб пакараць непасрэдных удзельнікаў і непасрэдных злачынцаў".

Прагучалі іншыя меркаваньні сёньня каля амэрыканскай амбасады:

(Мужчына: ) "Я прыхільнік філязофіі несупраціву злу гвалтам. Я думаю, што зло ніколі нельга перамагчы злом".

Кіроўца таксоўкі, якой я вярталася ў рэдакцыю, таксама выказаў стаўленьне да тэрарыстычных актаў у ЗША — маўляў, так ім і трэба, даўно ў Амэрыцы не было вайны. Але паўтарыць гэтыя ж словы, калі я дастала дыктафон, кіроўца адмовіўся. Адметна, што ніводнага падобнага меркаваньня ў кнізе спачуваньняў амбасады не было.

XS
SM
MD
LG