Лінкі ўнівэрсальнага доступу

АФІЦЫЙНА СЬЦЬВЯРДЖАЕЦЦА, ШТО Ў ГОМЕЛЬСКАЙ ВОБЛАСЬЦІ ЛУКАШЭНКА НАБРАЎ ДА 95 АДСОТКАЎ ГАЛАСОЎ…


Казімер Яноўскі, Гомельская вобласьць

Учора апоўначы, калі яшчэ лічылі галасы выбарцаў, асабіста мне давялося чуць размовы чальцоў камісіі пра тое, што вэртыкаль спаборнічае між сабой за больш высокія паказчыкі падтрымкі цяперашняга кіраўніка дзяржавы.

Падводзілі ў гэты час вынікі выбараў і прадстаўнікі незалежнага назіраньня. Але рабіць гэта было складана, паколькі адразу пасьля заканчэньня галасаваньня адключылі тэлефонную сувязь у аб'яднаньні "Грамадзянскія ініцыятывы" і моладзевым цэнтры "Гарт". Не было сувязі і ў мазырскіх актывістаў.

Як паведаміў рэагіянальны каардынатар назіральнікаў АБСЭ Багдан Пагрэбеньнік, нават у ягоным офісе тэлефоны не працавалі зь вечара да сёньняшняга ранку. На ўчастках хавалі інфармацыю ад назіральнікаў. Не давалі зьвестак пра колькасьць выбарцаў і тых, хто ўжо прагаласаваў. Не паказвалі сьпісаў, што супярэчыць нават пастанове Цэнтарвыбаркаму.

Апэратыўна ўдалося падвесьці толькі вынікі галасаваньня ў абласным цэнтры. Тут назіральнікі прывезьлі з участкаў пратаколы, якія старшыні камісіяў падпісаць адмовіліся. Вось што распавёў нашаму радыё каардынатар незалежнага назіраньня Ўладзімер Кацора:

(Кацора: ) "Удвая ўлады занізілі лічбу яўкі выбарцаў на ўчасткі падчас датэрміновага галасаваньня. Гэта было зроблена, каб потым аддаць гэтыя галасы аднаму з кандыдатаў. Вядома, якому".

Наогул, там дзе назіральнікаў ня выдалілі з участкаў, удалося атрымаць даволі паказальныя лічбы. Расказвае кіраўнік "Грамадзянскіх ініцыятываў" з Буда-Кашалёва Ігар Кекелеў:

(Кекелеў: ) "Паводле вынікаў назіраньня на 9-м Радзееўскім участку Буда-Кашалёўскага раёну агульная колькасьць выбарцаў, якія прагаласавалі, склала 430 чалавек — гэта афіцыйныя зьвесткі. Назіральнікі прысутнічалі тут зь першага дня і да закрыцьця ўчастку ўчора. Яны зафіксавалі 133 чалавекі, што прагаласавалі. Амаль 300 выбарцаў прыпісалі — яны фактычна на ўчастак не прыходзілі".

XS
SM
MD
LG