Лінкі ўнівэрсальнага доступу

ТЭХНАЛЁГІІ ПРЫХАВАНАЙ ПАДТРЫМКІ РАСЕЙСКІМІ ПАЛІТЫКАМІ КАНДЫДАТА ЛУКАШЭНКІ


Вячаслаў Ракіцкі, Прага

“Палітычная эліта Расеі канчаткова сфармулявала для сябе, як трэба ставіцца да прэзыдэнцкіх выбараў у Беларусі: перамога Лукашэнкі ўсё роўна загадзя вырашаная, таму застаецца толькі расслабіцца і атрымліваць задавальненьне, тым больш, што “ён, канешне, сукін сын, але ён наш сукін сын”. Так распачынае свой камэнтар да стасункаў Расеі і Беларусі на фоне прэзыдэнцкіх выбараў знаны публіцыст Максім Сакалоў у газэце “Известия”.

Максім Сакалоў выказвае сумнеў адносна выбару прыналежнага займеньніка “наш”. Ён піша: “Уяўленьне пра тое, што Аляксандар Рыгоравіч – наш, грашыць збытнай самаўпэўненасьцю. Ён выключна свой і дзеля самога сябе – у тым сэнсе, што расейскія інтарэсы маюць для яго нейкую важнасьць толькі ў той меры, у якой яны не супярэчаць ягоным уладным памкненьням. Калі ён – сем гадоў ягонага ўладараньня гэта даказалі – бліскуча ўмее вадзіць за нос расейскіх палітыкаў, гэта яшчэ недастатковая падстава лічыць яго “нашым”.

Аўтар газэты “Известия” піша, што ў Расеі “дагэтуль ніхто не паклапаціўся, каб падсумаваць вынікі сямігадовага раману з Лукашэнкам і паразрахаваць выгоды з выдаткамі. Магчыма, якраз таму, што бесстаронны падлік прымусіў бы моцна засумнявацца ў дакладнасьці слова “наш”.Разважаючы пра палітычныя канструкцыі Масквы і Лукашэнкі, Максім Сакалоў на старонках “Известий” робіць выснову адносна той пазыцыі, якую мусіла б заняць, зь ягонага гледзішча, Расея: “Трэба казаць не пра непазьбежнасьць лукашэнкавай перамогі, а пра тое – калі яна ўжо непазьбежная – каб параза апазыцыйнага кандыдата была максымальна годнаю, каб яна дазваляла прытомнай апазыцыі захоўваць неабходны пляцдарм на будучыню.”

Зусім інакш глядзяць на расейска-беларускія дачыненьні ў сувязі з прэзыдэнцкімі выбарамі аўтары публікацыяў у газэтах левай арыентацыі. Газэта “Правда” друкуе сёньня падрабязную справаздачу пра выступ Лукашэнкі ў Палацы Рэспублікі, акцэнтуючы перадусім ўвагу на выказваньнях Лукашэнкі супраць Захаду і прадстаўнікоў, як ён выказаўся, “пятай калёны” ў Расеі і Беларусі, што, паводле прамоўцы, “будуюць бар”еры на шляху да стварэньня адзінай дзяржавы”.

“Московскій комсомолец” надрукаваў сёньня рэцэнзію-памфлет Аляксандра Мінкіна на паказаны па расейскай тэлевізіі дакумэнтальны фільм “Адзін дзень з Прэзыдэнтам”. Рэцэнзуючы гэты фільм, жанр якога маскоўскі журналіст вызначыў як “салодкія сьліні”, аўтар указвае на тэхналёгіі прыхаванай падтрымкі расейскімі палітыкамі кандыдата Лукашэнкі. Вось адна цытата з саркастычнага артыкулу “Тэхналёгія свабоднага каханьня”:

“Фільм паказалі па расейскай тэлевізіі. Але паказалі яго ня нам, не тэлегледачам Расеі. Паказалі беларускаму электарату. Гэта – тэхналёгія. Чыстая, не зачэпішся. Хоць сьмярдзіць жахліва.

Нядзеля, вечар. 20 тысячаў даляраў мінута.

Атрымліваецца – 500 тысячаў даляраў. Гэта братэрняя Беларусь нам заплаціла? Калі так, то зь якіх сродкаў? Ці гэта наш падарунак? А навошта? Лукашэнка й так выйграе, атрымае свае 70 адсоткаў (якраз пасярэдзіне паміж нашымі 52 адсоткамі і туркмэнскімі 99 адсоткамі). Таму Пуцін і езьдзіў да яго на сьвята (хочаш альбо не, а бліжэйшымі гадамі з Лукашэнкам трэба сябраваць). Так што гэтае ганебнае кіно яшчэ і лішняе, і ад гэтага яшчэ больш ганебнае. Зрэшты, хтосьці, натуральна, зарабіў – мы іх віншуем.
Ці то нас прадалі нашыя тэхнолягі, ці то здалі ў арэнду. Пачуццьцё непрыемнае.” Так піша Аляксандар Мінкін у “Известиях” пра формы падтрымкі Расеяй кандыдата на прэзыдэнта Лукашэнку.

Газэта “Трибуна” ў артыкуле “Сьцямілі на трох адну праграму”, распавядаючы пра спосабы вядзеньня агітацыйнай кампаніі кандыдатамі на прэзыдэнта, адзначае, што “цяперашні кіраўнік дзяржавы выкарыстаў тое-сёе зь піяраўскіх напрацовак савецкіх часоў.Ва ўсіх рэспубліканскіх газэтах спачатку быў зьмешчаны здымак: кіраўнік дзяржавы трымае на руках шчасьлівую дзяўчынку, пасьля быў растыражаваны той жа сюжэт, але месца дзяўчынкі заняў усьмешлівы хлапчук. А сам Аляксандар Рыгоравіч заявіў, што калі народ хоча бачыць яго бацькам, дык ён будзе выконваць гэтую ролю.”
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG