Лінкі ўнівэрсальнага доступу

АБСЭ КРЫТЫКУЕ ХАДУ ВЫБАРЧАЙ КАМПАНІІ


Любоў Лунёва, Менск

На пачатку брыфінгу Граер Бальян паведаміў, што ўлады неапраўдана забараняюць назіральнікам правядзеньне прэсавых канфэрэнцыяў. Спадар Бальян падзяліўся плянамі на бліжэйшы час. У прыватнасьці, ён паведаміў, што колькасьць назіральнікаў значна ўзрасьце. Да цяперашніх 27 назіральнікаў заўтра далучацца яшчэ 200 — для кароткатэрміновага назіраньня. А ў чацьвер і ў пятніцу — яшчэ 79 чалавек ад Рады Эўропы.

Граер Бальян пералічыў, зь якіх менавіта прычынаў місія называе сябе місіяй менавіта з абмежаваным назіраньнем.

(Бальян: ) "З-за затрымкі прыезду мы прапусьцілі важныя этапы. Гэта, па-першае, рэгістрацыя кандыдатаў. Па-другое, мы ня бачылі, як цягам першага тыдня асьвятлялася кампанія ў сродках масавай інфармацыі. Па-трэцяе, місія мае мандат назіраць за поўным працэсам выбараў. Паколькі нам гэтага не дазволілі, мы вымушаныя былі назваць сябе місіяй з абмежаваным назіраньнем".

Спадар Бальян паведаміў, што прадстаўнікі місіі сустрэліся з двума з трох кандыдатаў на прэзыдэнта. Яны прасілі й Аляксандра Лукашэнку пра сустрэчу, але дагэтуль не атрымалі адказу. Граер Бальян распавёў таксама, што прадстаўнікі місіі сустрэліся як з апазыцыйнымі арганізацыямі, так і з пралукашэнкаўскімі, а таксама зь іншымі замежнымі і ўнутранымі назіральнікамі.

Граер Бальян адзначыў істотныя моманты, якія выклікаюць занепакоенасьць у сяброў місіі:

(Бальян: ) "Калі ёсьць тры кандыдаты, гэта плюс. Але праблема — доступ людзей да кожнага зь іх.

Гэта й працэс фармаваньня камісіяў. Абмежаваная магчымасьць правядзеньня агітацыйнай кампаніі. Датэрміновае галасаваньне. Працэс падліку галасоў. Правы назіральнікаў. Новае выбарчае заканадаўства, канечне, лепш, але ў ім ёсьць фундамэнтальныя мінусы".

Граер Бальян закрануў тэму агульнага клімату перадвыбарчай кампаніі.

(Бальян: ) "У нас ёсьць выпадкі парушэньня правоў чалавека. Гэта тычыцца журналістаў і назіральнікаў. Нас непакояць нападкі на актывістаў у дзяржаўнай прэсе. Непакоіць тое, што дзяржаўныя СМІ падаюць міжнародных назіральнікаў як людзей, што маюць злыя намеры. Але я лічу, што яшчэ ня позна ўсё гэта спыніць.

Таксама непакояць некарэктныя заўвагі наконт унутраных назіральнікаў у часе падліку галасоў. Мы ўвесь час падкрэсьліваем: няхай улады апублікуюць вынікі падліку галасоў. Давер будзе толькі тады, калі будзе праўдзівая інфармацыя пра ход падліку ў дэталях.

Нас непакоіць і асьвятленьне кампаніі ў дзяржаўных СМІ. Хачу падзяліцца лічбамі: на Беларускім тэлебачаньні 60% усяго часу даецца Лукашэнку, 7% — Домашу, 9% — Гайдукевічу і 20% — Ганчарыку. Якасны аналіз гэтых лічбаў: інфармацыя пра Лукашэнку толькі пазытыўная, пра Ганчарыка і іншых — нэгатыўная. Гэта ж тычыцца й газэтаў".

Граер Бальян паведаміў, што місія назірае й за тым, як асьвятляецца прэзыдэнцкая кампанія на расейскіх тэлеканалах ОРТ, РТР і НТВ, але пра вынікі назіраньня паведаміць на наступнай канфэрэнцыі.

Спадар Бальян паабяцаў, што на наступны дзень пасьля выбараў міжнародныя назіральнікі ад БДіПЧ надрукуюць свае заўвагі. А потым будзе агалошаная і супольная заява — праўда, з кім менавіта супольная, ён не сказаў.

Паводле Граера Бальяна, найбліжэйшым часам місія наведае 15% участкаў, каб зрабіць выбарку для назіраньня.

XS
SM
MD
LG