Лінкі ўнівэрсальнага доступу

ПЕРШЫ ДЗЕНЬ ДАТЭРМІНОВАГА ГАЛАСАВАНЬНЯ Ў МЕНСКУ СЬВЕДЧЫЦЬ ПРА НІЗКУЮ АКТЫЎНАСЬЦЬ ВЫБАРЦАЎ


Ігар Карней, Менск

Амаль усе выбарчыя ўчасткі, якія давялося наведаць, вельмі падобныя. У дзьвярах сустракае міліцыянт, потым сакратарка і, нарэшце, кіраўнік камісіі альбо ягоны намесьнік. Кіраўнікі выбарчых камісіяў вельмі асьцярожныя ў папярэдніх высновах і йдуць на кантакт неахвотна.

Напрыклад, намесьнік старшыні менскай выбарчай камісіі №1 Міхаіл Бурша адразу папярэдзіў, што "казаць у мікрафон" нічога ня будзе, а галасаваньне, маўляў, ідзе ў адпаведнасьці з Выбарчым кодэксам. Колькасьць людзей, якія датэрмінова прагаласавалі, назваць адмовіўся.

Больш ветліва сустрэлі ў былой вышэйшай партшколе, дзе цяпер філялягічны факультэт БДУ. Да абеду тут датэрмінова прагаласавалі толькі шэсьць чалавек. Усе — пэнсіянэры з вуліцы Маркса. У адказ на пытаньне "Ці чакаецца на ўчастак масавы прыход студэнтаў?", мяне запэўнілі, што ніякага прымусу да папярэдняга галасаваньня на факультэце не было.

Куды больш людна было на ўчастку сярэдняй школы №4, што непасрэдна мяжуе з рэзыдэнцыяй Аляксандра Лукашэнкі. Старшыня выбарчага ўчастку Людміла Вінаградава кажа, што задаволеная актыўнасьцю. Праўда, колькі канкрэтна людзей прыйшло на ўчастак, таксама не ўдакладняе.

(Вінаградава: ) "Ведаеце, мы гэтых зьвестак не афішуем, але — дастаткова. У параўнаньні зь мінулымі выбарамі (я тады таксама тут сядзела) намнога вышэйшы адсотак. Што яшчэ зьдзіўляе: ня толькі йдуць людзі сярэдняга ўзросту, старэйшага; ідуць і маладыя. Для першага дня дастаткова высокая актыўнасьць".

На ўчастку сёньня можна было ўбачыць у асноўным людзей сталага ўзросту, якія не хавалі, за каго аддаюць галасы.

(Выбаршчыца: ) "Хочацца быць першай з-за павагі да нашага былога прэзыдэнта. У нядзелю нічым занятая ня буду, але хачу прагаласаваць датэрмінова — і я, і сын, і муж. Зь вялікім задавальненьнем. Чым раней, тым лепей".

Зрэшты, ня ўсе падзяляюць такое меркаваньне. Прыходзяць і такія, каму, наадварот, ня церпіцца разьвітацца зь мінулым.

(Другая выбаршчыца: ) "Я, прыкладам, ня бачу ад гэтага прэзыдэнта добрага жыцьця. Разумею і ўсім гэта тлумачу. Хачу пераканаць, але народ у Беларусі пакуль сам не адчуе гэтага болю, ён нічога не зразумее. Відавочна, павінен кожнага закрануць гэты боль".

Ні на адным з выбарчых участкаў я не знайшоў незалежных назіральнікаў. Але адна з ініцыятарак назіраньня Сьвятлана Скрыпчанка кажа, што яны абавязкова будуць.

(Скрыпчанка: ) "Пераважна гэта маладыя людзі, канечне. Падняць больш сталых амаль немагчыма. Ня хочуць, ім гэта нецікава, сёньняшняе становішча цалкам задавальняе. Падабаецца карачыцца на градах — няхай працуюць".

Заўтра датэрміновае галасаваньне працягнецца. Але нават кіраўнікі ўчасковых выбарчых камісіяў сумняюцца, што актыўнасьць будзе большай за сёньняшнюю.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG