Лінкі ўнівэрсальнага доступу

У ВІЦЕБСКУ ПРАВЯЛІ ПЕРАТРУС І СКАНФІСКАВАЛІ ТЭХНІКУ Ў ГРЭКА-КАТАЛІЦКАЙ ПАРАФІІ


Браніслава Станкевіч, Віцебск

Сеньня а палове на трэцюю ў прыватную хату, дзе месьціцца віцебская грэка-каталіцкая парафія, зьявіўся участковы міліцыянт. У парафіі знаходзіўся на той час толькі адзін зь вернікаў Алесь Грэнь, якому міліцыянт сказаў, што мусіць праверыць адну заяву – маўляў, міліцыі стала вядома, нібыта ў парафіі падпольна вырабляюць гарэлку...

Зьвязацца з гаспадаром хаты сп. Грэню не дазволілі. Самі ж міліцыянты адразу скіраваліся і той пакой, дзе стаяў рызограф ды захоўваліся асобнікі віцебскага недзяржаўнага дайджэсту "Свабоднае слова". Праз колькі часу да парафіі зьехаліся супрацоўнікі фінансавае міліцыі, апэратыўная група з Чыгуначнага РАУСу, а таксама шмат людзей у цывільным. Прычым далёка ня ўсе зь іх пажадалі прадставіцца прыехаўшаму таксама гаспадару хаты Ігару Цішкіну.

Тым ня менш міліцыянты адразу ж затрымалі ды завезьлі ў пастарунак кіраўніка цэнтру імя Льва Сапегі Хрыстафора Жаляпава, які ня меў пры сабе асабістых дакумэнтаў, і наадварот – у карэспандэнта газэты "День" Вадзіма Баршчэўскага адабралі рэдакцыйнае пасьведчаньне, бо яно падалося міліцыянтам падробленым. На вачах у гаспадара Ігара Цішкіна, не прадставіўшы пісьмовага дазволу, міліцыянты вынесьлі з хаты ды гаражу ня толькі рызограф ды газэты, але й усе матэрыялы для памнажэньня і нават два старыя інфармацыйныя стэнды.

Спадароў Грэня, Цішкіна ды Баршчэўскага завезьлі ў фінансавую міліцыю, дзе прымусілі даць тлумачэньні адносна іхнага знаходжаньня на месцы падзеяў, а сп. Цішкіна яшчэ й дапыталі пра ягонае дачыненьне да апісанае маёмасьці. Дарэчы, на адабраную аргтэхніку міліцыянты паглядалі зь непрыхаванай зайздрасьцю, а адабранай паперай хацелі падзяліцца нават з медсястрой бліжэйшага дзіцячага садка, якую заабавязалі быць панятой. Невядома, чым бы скончыўся ў такім разе ператрус, калі б кіраўнік Віцебскае філіі БГК Леанід Чыграй не патлумачыў міліцыянтам, што заўважыў чарговае сеньняшняе перавышэньне іхных службовых паўнамоцтваў.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG