Лінкі ўнівэрсальнага доступу

КААРДЫНАЦЫЙНАЯ РАДА ДЭМАКРАТЫЧНЫХ СІЛАЎ ПРЭЗЭНТАВАЛА ПРАГРАМУ САЦЫЯЛЬНА-ЭКАНАМІЧНЫХ РЭФОРМАЎ ДЛЯ БЕЛАРУСІ


Ягор Маёрчык, Менск

Паводле праграмы, рэформы прапануецца ажыцьцяўляць па некалькіх накірунках — грашовая і падатковая сфэры, рэфармаваньне прамысловасьці й сельскай гаспадаркі, зьмяненьне сыстэмы сацыяльнай абароны.

Аўтары праграмы лічаць, што трэба даць Нацыянальнаму банку сапраўдную незалежнасьць ад ураду і парлямэнту і рэфармаваць банкаўскую сыстэму. Падаходны падатак мусіць быць адзіны для ўсіх і складаць 10% ад даходу.

Рэфармаваньне прамысловасьці плянуецца ажыцьцяўляць праз прыватызацыю і прыцягненьне замежных інвэстыцыцяў. Дзяржава павінна гарантаваць падтрымку малога і сярэдняга бізнэсу, а таксама фэрмэраў і прадпрымальнікаў у аграрным сэктары.

Старшыня ў Каардынацыйнай радзе дэмакратычных сілаў Анатоль Лябедзька, былы кіраўнік Нацыянальнага банку Станіслаў Багданкевіч і дырэктар Цэнтру разьвіцьця нацыянальнай канкурэнтаздольнасьці Павал Данэйка, якія і прэзэнтавалі праграму рэформаў, заявілі жуналістам, што Ўладзімер Ганчарык ужо пазнаёміўся з плянам пераўтварэньняў. І, як паведаміў Павал Данэйка, на 80% ён згодны з праграмай.

Анатоль Лябедзька кажа, што гэта не азначае таго, што адзіны кандыдат у выпадку перамогі на выбарах будзе праводзіць рэформы менавіта паводле гэтай праграмы:

(Лябедзька: ) "Калі 9-га верасьня мы выйграем, Ганчарык — калі ён хоча застацца прэзыдэнтам — а ня новым правіцелем, проста мусіць сказаць, што гэта мая праграма, я яе буду выконваць.

Разам з тым, сёньняшні кандыдат ад шырокай грамадзянскай кааліцыі абапіраецца ня толькі на дэмакратычныя сілы, але й на намэнклятуру, і на левых. Натуральна, што калі камуністы-калякінцы пачытаюць гэтую праграму, у іх будзе багата пытаньняў, натуральна, калі намэнклятура пачытае праграму, у яе таксама будуць пытаньні. Таму што іхныя інтарэсы крышку разыходзяцца. Мы зыходзім ня зь нейкага чыстага варыянту, мы зыходзім з эўрапейскага, які павінен быць".

Адказваючы на пытаньне карэспандэнта Радыё Свабода, былы старшыня Нацыянальнага банку Станіслаў Багданкевіч назваў эканамічную частку перадвыбарчай праграмы Аляксандра Лукашэнкі "надзвычай слабой".

(Багданкевіч: ) "Я сказаў бы, што ёсьць рэчы, зь якімі я цалкам згодны — гэта, прыкладам, свабода слова і свабода веравызнаньня. Аднак што да макраэканомікі ды інвэстыцыяў — ні слова няма ў ягонай праграме. Уся праграма пабудаваная на прыгожых лёзунгах, якія прамаўляліся пры савецкай уладзе. Гэта прыгожа гучыць, але няма ніякай канкрэтыкі. Шчыра кажучы, праграма надзвычай слабая".
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG