Лінкі ўнівэрсальнага доступу

ЦІ ВЕДАЮЦЬ МЕНЧУКІ ПРА ЗАЎТРАШНІ ПАЧАТАК ТЭЛЕВЫСТУПАЎ КАНДЫДАТАЎ?


Ганна Соусь, Менск

Многія менчукі ведаюць, што заўтра кандыдаты на прэзыдэнта распачнуць выступаць на тэлебачаньні, але далёка ня ўсе маюць час, каб паслухаць выступы.

(Жанчына: ) "Ведаю".

(Мужчына: ) "Вядома".

(Мужчына сталага веку: ) "А хто будзе выступаць? Заўтра? Я прыйду. А куды?"

(Пэнсіянэрка: ) "Ведаю, але ў мяне тэлевізар не працуе, пайду да суседкі глядзець".

(Малады чалавек: ) "Ня буду глядзець, таму што буду заняты іншымі справамі".

(Мужчына: ) "Мне ўсё роўна, як яны будуць выступаць".

Выступы кандыдатаў на прэзыдэнта будуць трансьляваць у запісе. Нагадаю, што Цэнтарвыбаркам адмовіўся даць жывы эфір Уладзімеру Ганчарыку, Сямёну Домашу й Сяргею Гайдукевічу.

Але практычна ўсе мае суразмоўцы хацелі б паглядзець на кандыдатаў на прэзыдэнта ў простай трансьляцыі. Гаворыць юрыст Міхал:

(Міхал: ) "Я лічу, што кожны з кандыдатаў павінен выступаць у простым эфіры, каб людзі бачылі, чулі зь першага, так бы мовіць, слова. Іншага я не ўспрымаю".

Гэтак жа думае й работніца чыгункі Леакадзія:

(Леакадзія: ) "У простым... А ў запісу я чалавека ня буду бачыць, праўда? Я жыву ў Ждановічах. Хадзілі ў нас зьбіраць подпісы, і я ім гавару: "Што ж вы подпісы зьбіраеце, мы гэтых людзей ня бачым і ня ведаем".

Былі й такія меркаваньні:

(Малады чалавек: ) "Ня нам гэта вырашаць, але ж трэба было б, каб ім дазволілі. Шкада, што не зрабілі гэтага".

(Мужчына: ) "Больш цікава было б у простым... Усё бачна".

(Мужчына: ) "Канечне, лепш просты эфір".

Сярод маіх суразмоўцаў былі й тыя, хто аддае перавагу запісу. Гэта настаўніца спадарыня Анастасія. Сама яна ня будзе глядзець выступы кандыдатаў на прэзыдэнта.

(Анастасія: ) "Глядзець ня буду, таму што даўно вырашыла, за каго буду галасаваць. Гэта не сакрэт — за Ганчарыка. Калі ідзе жывы эфір, то за такі кароткі тэрмін добрага ўражаньня пра любога кандыдата можа і ня быць. Таму гэта мусіць быць толькі ў запісе. Кандыдаты павінны паказаць свае добрыя якасьці".

А вось меркаваньне Аляксея Ліцьвінчука:

(Ліцьвінчук: ) "Трэба прытрымлівацца тых парадкаў, якія ёсьць у дзяржаве. Я напрыклад, і так згодны, і гэтак".

Што да часу выступаў кандыдатаў на радыё й тэлебачаньні, то юрыст Міхал мяркуе, што ён досыць зручны.

(Міхал: ) "Раніцай і ўвечары. Хто ідзе на працу ў першую зьмену, увечары паслухае, а хто ў другую — наадварот".

Але ж большасьць апытаных мяркуе, што гэты час — ня самы лепшы, і многія папросту ня будуць мець магчымасьці паглядзець па тэлебачаньні выступы кандыдатаў на прэзыдэнта.

XS
SM
MD
LG