Лінкі ўнівэрсальнага доступу

logo-print

ЛІДЗІЯ ЯРМОШЫНА: ПОДПІСЫ ЗА АЛЯКСАНДРА ЛУКАШЭНКУ САПРАЎДЫ ЗЬБІРАЛІСЯ Ў ПСЫХІЯТРЫЧНАЙ ЛЯКАРНІ


Валер Каліноўскі, Менск

Раней старшыня ЦВК Лідзія Ярмошына заяўляла, што паколькі больш за 100 тысяч подпісаў змаглі здаць толькі чатыры прэтэндэнты, рэгістрацыя кандыдатаў магчымая 8–9 жніўня. Аднак ўрэшце вырашылі рэгістрацыю правесьці ў апошні магчымы тэрмін — 14 жніўня. Гэта зьмяншае тэрмін на агітацыю. Лідзія Ярмошына тлумачыць гэткае рашэньне:

(Ярмошына: ) "Адцягваем не таму, што гэта робіцца наўмысна. Прэтэндэнты падалі дэклярацыі на сябе і блізкіх родзічаў вельмі позна, апошняя была прадастаўленая ў мінулую пятніцу. І толькі ў гэты панядзелак нашыя супрацоўнікі змаглі перадаць гэтыя дэклярацыі для праверкі ў розныя ведамствы: МУС, Міністэрства жыльлёва-камунальнай гаспадаркі, Камітэт зямельных рэсурсаў, Міністэрства юстыцыі, Падатковы камітэт і іншыя — усяго там, па-мойму, 9 органаў".

Пры гэтым Лідзія Ярмошына прызналася, што ў Цэнтарвыбаркаме ўлічвалі і пэўныя прымхі:

(Ярмошына: ) "Цалкам магчыма, што гэта можна было б правесьці й 13 жніўня, але вы ведаеце, я лічу, што панядзелак 13 жніўня, — гэта нават у вас выклікала б рэакцыю — прынамсі жартаўлівую".

Такім чынам, 14 жніўня ў залі для прыёмаў Палацу Рэспублікі адбудзецца паседжаньне ЦВК у справе рэгістрацыі кандыдатаў, пасьля чаго распачнецца агітацыя. Кожны кандыдыт у прэзыдэнты атрымае на яе зь бюджэту па 2300 мінімальных заработных плат, што складае каля 14 тысяч даляраў.

Лідзія Ярмошына лічыць, што праблемаў з подпісамі ў прэтэндэнтаў ужо ня будзе, бо тэрытарыяльныя камісіі ў гэтай чацьвёркі забракавалі значна менш чым 15% подпісаў. Дэклярацыі кандыдатаў будуць апублікаваныя да 24 жніўня.

Старшыня ЦВК пацьвердзіла, што ў Магілёўскім псыханэўралагічным дыспансэры зьбіралі подпісы за Аляксандра Лукашэнку, але зазначыла, што падпісаліся там усяго 16 людзей сталага веку, якія не пазбаўленыя выбарчага права, а знаходзяцца ў дыспансэры, бо ім проста няма дзе жыць.

Лідзія Ярмошына зазначыла, што паводле яе інфармацыі, назіральнікаў ад АБСЭ і БДІПЧ на прэзыдэнцкія выбары запросяць сёньня ці заўтра, але яна лічыць, што ўнутраныя назіральнікі значна больш падрыхтаваныя і агрэсіўныя, чым замежныя. Увогуле, старшыні ЦВК вельмі не падабаецца, што некаторыя палітыкі і СМІ ўжо цяпер гавораць пра тое, што рыхтуецца фальсыфікацыя выбараў, на што яна і паскардзілася ў размове з Аляксандрам Лукашэнкам.

(Ярмошына: ) "Мне ніхто не пагражаў, мне няма за што пагражаць, я не плакалася — не дачакаецеся. Гэта вырваўся крык душы, калі я без канца чытаю пра сябе і галоўным чынам ня толькі пра сябе, а пра самых сумленных людзей, лепшых нашых грамадзянаў, якія ўвайшлі ў склад выбарчых камісіяў, якіх з самага пачатку апрыёры вызначаюць як фальсыфікатараў", — сказала Лідзія Ярмошына.

Разам з тым яна не расцаніла як парушэньне агітацыю А.Лукашэнкі за сябе да рэгістрацыі і, у прыватнасьці, заяву пра тое, што ягоную выбарчую кампанію праводзіць выканаўчая вэртыкаль. Гэта "проста агаворка спадара Лукашэнкі", — зазначыла яна.


XS
SM
MD
LG