Лінкі ўнівэрсальнага доступу

НЯМЕЧЧЫНА ЛЕГАЛІЗАВАЛА ГОМАСЭКСУАЛЬНЫЯ ШЛЮБЫ


Валерыя Красоўская, Прага

“Гэта цудоўна, што зараз існуе закон для такіх людзей, як мы,” – сказла Анжэла Гобэлін пасьля таго, як яна ды Верэна Лаппэ пабраліся шлюбам.

Спадарыня Гобэлін ды спадарыня Лаппэ былі адной зь пятнаццаці параў, якія паўсталі перад рэгістратарам гарадзкой управы ў паўночнай Нямэччыне. І пасьля таго, як пары абмяняліся сваімі шлюбнымі парсьцёнкамі, яны калектыўна адсьвяткавалі падзею ружамі, пацалункамі ды сьлязамі.

Чальцы партыі Зялёных “Саюз-90”, кіруючай палітычнай партыі, адзначалі прыняцьцё новага закону з такой радасьцьцю, нібыта і яны знайшлі сабе партнэра на ўсё жыцьцё. Клаўдыя Ротт, адна зь лідэраў партыі, азначыла закон як “вялікі посьпех Зялёных, вялікі посьпех дэмакратыі”.

Дакладная лічба параў, што абмяняліся шлюбнымі клятвамі ў сераду, невядомая, але паводле прыкладных падлікаў іх каля пяцідзесяці. Але ня ўсе гомасэксуалы маглі ў сераду выкарыстаць закон, бо некаторыя рэгіёны Нямеччыны, у тым ліку і Баварыя, не зацьвердзілі яшчэ закон.

На думку ўраду Баварыі, закон замахваецца на сьвятасьць жаніцьбы ды сям’і. Баварыя разам з Саксоніяй зьявярнуліся да Фэдэральнага Канстытуцыйнага Суду, вышэйшай юрыдычнай установы Нямэччыны, з тым, каб той адклаў пачатак дзеяньня закону да тых часоў, пакуль ня будзе прызнана яго абсалютная канстытуцыйнасьць. Суд адхіліў заяву і тым самым даў зялёнае сьвятло цырымоніям, што адбыліся ў сераду. Чакаецца, што пастанова аб правамернасьці закону будьзе выдадзеная пазьней сёлета.

У сьпякотны дзень у Мюнхене, сталіцы Баварыі, два гомасэксуалісты, апранутыя ў фракі, прыйшлі да будынку гарадзкой ратушы, дзе яны хацелі правесьці сваю асабістую цэрэмонію шлюбу. Яны выказалі пратэст супроць плянаў Баварыі. “Усім, апрача нас, дадзенае права жаніцца,” – было напісана на плякаце, які яны трымалі.

Баварыя плянуе прайсьці працэдуру ўвядзеньня закону ўвосень. Улады хочуць прымусіць гомасэксуальныя пары замацоўваць свой саюз у натарыяльных устаноах, якія звычайна займаюцца справамі нерухомай маёмасьці, а не ў рэгіструючых ворганах, дзе замацоўваюць свае шлюбныя повязі гетэрасэксуальныя пары.

Тыя пары, якія мелі магчымасьць скарыстацца вышэйзгаданым законам, атрымалі аднолькавыя правы са “звычайнымі” парамі: яны могуць браць сябе такія ж прозьвішчы, карыстацца такімі ж страхавымі полісамі і спадчыннымі правамі. Яны толькі ня маюць права ўсынаўляць дзяцей. Каб разьвесьціся, гомасэксуалам таксама будзе патрэбнае судовае рашэньне.

Сярод іншых краінаў, якія далі легальны статус гомасэксуальным парам, Данія, Нарвэгія, Францыя, Галяндыя.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG