Галоўны юрыст Лукашэнкавай адміністрацыі паведаміў журналістам, што ўчора быў падпісаны новы дэкрэт пра адтэрміноўку перарэгістрацыі суб'ектаў гаспадараньня да 1 ліпеня наступнага году. Але ўсіх больш цікавіў дэкрэт №20 — пра дэкляраваньне маёмасьці й даходаў кандыдатамі на прэзыдэнта ды іхнымі сваякамі. Бадай, упершыню прадстаўнік Аляксандра Лукашэнкі адкрыта заявіў:
(Галаванаў: ) "Прэзыдэнт у гэтым выпадку, я лічу, зыходзіў ня толькі нават з праўных меркаваньняў, але й, ведаеце, з гэткіх палітычных меркаваньняў. Усе ведаюць, што паўнамоцтвы ў нашага кіраўніка дзяржавы паводле нашай дзейнай Канстытуцыі Рэспублікі Беларусь такія значныя, таму — каб ня трапіў выпадковы чалавек на такую пасаду".
Наконт таго, ці прадставіць Аляксандар Лукашэнка дэклярацыю пра даходы й маёмасьць свайго бацькі, адказаў гэтак:
(Галаванаў: ) "Ну, я ня ведаю, якое ён мае на сёньняшні дзень сямейнае становішча. Але дэклярацыю пра сваіх найбліжэйшых сваякоў ён прадставіць гэтаксама, як і іншыя кандыдаты".
Віктар Галаванаў таксама адказаў на пытаньне пра сакрэтныя ўказы Аляксандра Лукашэнкі ды ўпершыню прызнаў, што такія сакрэтныя ўказы ёсьць.
(Галаванаў: ) "Мне невядомая такая інфармацыя — колькі ён падпісвае сакрэтных указаў. І я лічу, што ўказы сакрэтныя або, як кажуць няслушна,— "не для друку",— яны ў любой дзяржаве ёсьць. Але ў любым выпадку — гэта канстытуцыйны прынцып — калі гэты ўказ ці дэкрэт прэзыдэнта закранае правы й свабоды грамадзянаў, ён у абавязковым парадку мусіць быць апублікаваны. Калі ён не апублікаваны, ён ня мае юрыдычнае сілы,
Заявіў начальнік галоўнае дзяржаўна-праўнае ўправы Лукашэнкавай адміністрацыі.
Нагадаю, што з гэтай адміністрацыі выйшаў сакрэтны ўказ №19 ад 12 студзеня 1998 году, які нідзе не апублікаваны, але афіцыйна прызнаны "нарматыўным актам" у рашэньнях Менскага гарадзкога суду й Пракуратуры Беларусі. Крыніца ў адміністрацыі паведаміла, што менавіта ва ўказе №19 ішла мова пра стварэньне асаблівае адзінкі, якую цяпер называюць "эскадронам сьмерці".
Што да абнародваных Уладзімерам Ганчарыкам і апублікаваных у недзяржаўнай прэсе матэрыялаў пра гэты эскадрон, якія Аляксандар Лукашэнка назваў "кошыкам сьмецьця", дык ягоны юрыст мае іншую пазыцыю наконт "папераў Ганчарыка":
(Галаванаў: ) "Па-першае, на мой погляд, яны патрабуюць нейкай такой дадатковай, грунтоўнай праверкі — упаўнаважанымі дзяржаўнымі ворганамі.
Я ня думаю, што дзяржаўныя ворганы, спэцслужбы і, у прыватнасьці, службовыя асобы пэўныя, прозьвішчы якіх там былі азначаныя, замешаныя ў забойствах, зьнікненьнях і гэтак далей. Ня думаю.
І па-трэцяе, я лічу, што, калі гонар і годнасьць службовае асобы нейкім друкаваным органам закранаецца або паклёп на іх дапускаецца, у гэтых грамадзян ёсьць нададзенае ім права зьвярнуцца ў суд па абарону сваіх правоў ды інтарэсаў",— зазначыў Віктар Галаванаў.
Чаму службовыя асобы, якіх абвінавацілі ў стварэньні "эскадрону сьмерці" ды палітычных забойствах, ня лічаць неабходным зьвяртацца ў суд, ён не патлумачыў.
