Лінкі ўнівэрсальнага доступу

БЕЛАРУСКІЯ ЎЛАДЫ НАЎМЫСНА ЗАЦЯГВАЮЦЬ ЗАПРАШЭНЬНЕ МІЖНАРОДНЫХ НАЗІРАЛЬНІКАЎ


Уладзімер Глод, Менск

Паводле словаў Ганса-Георга Віка, на 25 ліпеня афіцыйных запрашэньняў міжнародныя назіральнікі з структураў АБСЭ ад беларускіх уладаў не атрымлівалі. Хаця яны ўжо гатовыя распачаць працу непасрэдна ў Беларусі. Першая група з 14 назіральнікаў мела намер прыехаць сюды за 6 тыдняў да дня галасаваньня, а гэта значыць, якраз сёньня. Аднак ніхто без запрашэньня ў Менск не паедзе.

Такая палітыка беларускіх уладаў робіцца асабліва незразумелай на тле ўчорашніх дамоўленасьцяў паміж кіраўніком Бюро дэмакратычных інстытутаў і правоў чалавека амбасадарам Штудманам і кіраўніком расейскага ЦВК спадаром Вешняковым. Паводле афіцыйнага прэсавага рэлізу, які сёньня распаўсюдзіла Бюро, "...Дасягнутая дамова, што назіральнікі ад Цэнтральнай выбарчай камісіі Расейскае Фэдэрацыі будуць супрацоўнічаць з назіральнікамі Бюро дэмакратычных інстытутаў і правоў чалавека ў рамках назіральнай выбарчай місіі ў Беларусі".

Чаму ж беларускае кіраўніцтва зацягвае справу з замежнымі назіральнікамі? Вось што кажа на гэты конт Галіна Сямдзянава, якая старшынявала на сёньняшнім паседжаньні.

(Сямдзянава: ) "Ужо пачалася праверка подпісаў у падпісных лістах і тое, што мы дагэтуль ня ведаем, колькі людзей на самой справе здало 100 тысячаў подпісаў, сьведчыць пра тое, што ўлады ня хочуць, каб нехта зь міжнародных назіральнікаў пры гэтым прысутнічаў і мог зафіксаваць парушэньні заканадаўства. Бо падлічыць мэханічна — колькі подпісаў здалі ў тэрытарыяльна-выбарчыя камісіі — гэта справа некалькіх гадзінаў. А мы ўжо тыдзень ня маем зьвестак пра тое, ці сабралі людзі 100 тысячаў подпісаў, ці не. Таму, я думаю, што пасьля таго, як подпісы будуць спраўджаныя, можа быць пасланае запрашэньне для назіральнікаў за выбарамі. Толькі пасьля спраўджваньня подпісаў".

Між тым, сёньня стала вядома, што з 31 ліпеня па 3 жніўня Менск наведае прадстаўнічая дэлегацыя Парлямэнцкай асамблеі Рады Эўропы. У Беларусь прыяжджаюць старшыня Палітычнага камітэту Парлямэнцкай асамблеі Тэры Дэйвіс (Вялікая Брытанія), дакладчык у справах Беларусі Вольфганг Бэрандт (Нямеччына) і кіраўнік камітэту правоў чалавека Цырыл Свобада (Чэхія). У іх адбудзецца шэраг сустрэчаў як з афіцыйнымі ўладамі — у прыватнасьці плянуецца сустрэча з Аляксандрам Лукашэнкам, гэтак і з апазыцыйнымі структурамі. У палітычных кулюарах Беларусі сёньня можна было пачуць, што афіцыйныя запрашэньні для міжнародных назіральнікаў будуць прымеркаваныя менавіта да гэтага візыту.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG