Лінкі ўнівэрсальнага доступу

ЦІ ПРЫМУШАЛА КІРАЎНІЦТВА ЗАВОДУ “АТЛЯНТ” ПАДПІСВАЦЦА ЗА ДЫРЭКТАРА КАЛУГІНА?


Міхал Стэльмак, Менск

Як паведаміў сёньня нашаму радыё сакратар Цэнтарвыбаркаму Мікалай Лазавік, скарга паступіла ад работнікаў менскага заводу "Атлянт".

(Лазавік: ) "Гэтая інфармацыя паступіла да нас па тэлефоне, званілі работнікі прадпрыемства. Сутнасьць інфармацыі ў тым, што на кіраўнікоў структурных падразьдзяленьняў ускладзены абавязак зьбіраць подпісы за дырэктара. Гэтыя тэлефанаваньні не ананімныя — людзі назвалі сябе. Але паколькі яны працуюць на гэтым прадпрыемстве і непакояцца з прычыны магчымага перасьледу з боку кіраўніцтва, то папрасілі не называць іхных прозьвішчаў", — паведаміў Мікалай Лазавік.

Паводле ягоных словаў, зараз Цэнтарвыбаркам і пракуратура распачынаюць сумесную праверку гэтай інфармацыі.

Адміністрацыя заводу ціск на работнікаў "Атлянту" адмаўляе. Ня чулі пра прымусовы збор подпісаў і ў прафсаюзным камітэце заводу. Вось што зазначыў на гэты конт старшыня прафкаму Валеры Нікалаенка:

(Нікалаенка: ) "Дзейнічае ініцыятыўная група, у якую ўваходзяць і прафсаюзныя актывісты. Зьвесткі пра тое, што нібыта паступіла каманда ўсіх прымусіць зьбіраць подпісы, ня маюць падставаў. Як гэта можна ўсіх прымусіць, калі трэба працаваць. На заводзе працуе каля 8 тысяч чалавек, дык хіба можна прымусіць усіх накіраваць на збор подпісаў?!

Я мяркую, што тут праблема перабольшаная. З тых, хто працуе на нашым заводзе, хтосьці зьбіраецца галасаваць і зьбірае подпісы за дзейнага прэзыдэнта, а хтосьці ходзіць і зьбірае подпісы за нашага генэральнага дырэктара, а хтосьці — за іншых прэтэндэнтаў. Камусьці кандыдатура нашага генэральнага дырэктара падабаецца, а камусьці і не".

Спадар Нікалаенка не выключае, што некаторыя пакрыўджаныя на кіраўніка заводу работнікі насамрэч маглі патэлефанаваць у Цэнтарвыбаркам. Між тым, паводле ягоных словаў, ініцыятыўная група Леаніда Калугіна, у складзе якой 120 чалавек, зьбірае подпісы пасьпяхова — сабралі ўжо дзясяткі тысячаў подпісаў.

На думку заводзкага начальства, скандал мог спатрэбіцца і нядобразычліўцам дырэктара з уладных структураў. Кіраўніца эканамічнай службы "Атлянту" Зоя Літвінава лічыць абвінавачаньні на адрас Леаніда Калугіна неабгрунтаванымі:

(Калугін: ) "Па тэлебачаньні, напрыклад, гавораць пра нэгатыўныя бакі "Атлянту". Між тым, ніхто ня ўлічвае ўмоваў нашай працы на зьнешніх рынках. Напрыклад, на нашу прадукцыю было падвоенае падаткаабкладаньне. А яшчэ, калі іншыя прадпрыемствы паадмаўляліся ад сацыяльнай сфэры, то на нас "вісяць" і дзіцячыя садкі, і інтэрнаты, і тое, што мы мусім займацца дабрачыннасьцю. Вось гэтага чамусьці ніхто не адзначае, а зьвяртаюць увагу толькі на нэгатыўныя бакі", — абураецца спадарыня Літвінава.

XS
SM
MD
LG