Лінкі ўнівэрсальнага доступу

МІЛІЦЫЯ РАЗГРАМІЛА ОФІС ГАЗЭТЫ “ВОЛЬНЫ ГОРАД” У КРЫЧАВЕ І ЗАХАПІЛА ЯЕ СУПРАЦОЎНІКАЎ


Ігар Карней, Менск

Супрацоўнік газэты "Вольны горад" Зьміцер Сяргееў, які патэлефанаваў у менскае бюро Радыё Свабода, паведаміў, што сачыць за кватэрай рэдакцыі пачалі ўжо даўно. Прыкладам, учора міліцыянт дзяжурыў у пад’езьдзе цягам сутак. А сёньня міліцыянты ўварваліся ў памяшканьне. Гаворыць Зьміцер Сяргееў:

(Сяргееў: ) "Сёньня раніцай, калі наш чалавек спрабаваў зайсьці ў кватэру, дзе месьціцца рэдакцыя "Вольнага гораду", разам зь ім уварваўся міліцыянт. Другога не пусьцілі, пасьпеўшы зачыніць перад ім дзьверы. Але той адразу ж зьвязаўся па рацыі з кіраўніком раённай міліцыі, і хвіліны праз 3-4 зьявілася цэлая брыгада.

Той супрацоўнік, які застаўся ў офісе, не прад’явіў ніякіх дакумэнтаў, не сказаў і пра мэту свайго няпрошанага візыту. Толькі празь некаторы час сказаў, што ў яго дрэнна з сэрцам і папрасіў адчыніць дзьверы. Як толькі дзьверы адчынілі, адразу ж уварваліся астатнія міліцыянты і забралі ўсіх супрацоўнікаў — Няроўнага, Маторанку, Баравікова.

Канфіскавалі ўсю тэхніку, пагрузілі ў машыны й адвезьлі ў райаддзел міліцыі; зараз апісваюць разам з газэтамі, што знайшлі ў рэдакцыі (а гэта спэвыпускі "Нашай свабоды", "Рабочага", "Праваабарончага весьніка" і некаторыя іншыя). Саму кватэру апячаталі, узялі пад варту і нікога туды не пускаюць".

(Карэспандэнт: ) "Калі не памыляюся, у гэтым памяшканьні таксама месьціцца й штаб збору подпісаў за Сямёна Домаша?"

(Сяргееў: ) "Так, так. Разам з рэдакцыяй у нас і штаб Домаша. Тут базавалася ягоная ініцыятыўная група".

Спадар Сяргееў мяркуе, што прычына такога гвалту найперш палітычная, бо мясцовая ўлада, паводле ягоных словаў, напалоханая актыўнасьцю каманды Сямёна Домаша.
XS
SM
MD
LG