Лінкі ўнівэрсальнага доступу

ТРЭЦІ РАЗ СЁЛЕТА АБРАБАВАЛІ МЕНСКІ ОФІС БЕЛАРУСКАГА ГЕЛЬСЫНСКАГА КАМІТЭТУ


Ігар Карней, Менск

Паводле старшыні Беларускага Гельсынскага камітэту Тацяны Процькі, рабаўніцтва адбылося неўзабаве пасьля таго, як міліцыя паведаміла, што прыпыняе расьсьледаваньне справаў пра ранейшыя рабаваньні. Спадарыня Процька распавяла:

(Процька: ) "Гэта трэці выпадак, калі рабуюць наш менскі офіс. Чаму такая цікаўнасьць менавіта да гэтага офісу? Гэтым разам там не было ніякага абсталяваньня, мы пасьля апошніх выпадкаў ужо нічога не ўзнаўлялі. А што тады патрэбна? На гэтым офісе знаходзяцца сьпісы назіральнікаў, даклады пра парушэньні правоў чалавека ў Беларусі. Гэта й цікавіць. Почырк той жа самы, абрабавалі гэтак жа, як і мінулы раз. Значыцца, ведалі, куды йдуць, ведалі, што там засталося".

(Карэспандэнт: ) "Такім чынам, пацярпела толькі тэхніка?"

(Процька: ) "Так, бо ляжалі чатыры колы ад "Мазды", якія каштуюць нашмат болей за тую тэхніку, што зьнесьлі — дык яны й засталіся ляжаць. Магнітаоптыка, якая каштуе зусім ня мала, таксама засталася".

(Карэспандэнт: ) "У міліцыю вы зьвярталіся?"

(Процька: ) "Мы й першы раз зьвярталіся, і ўсе астатнія. Але паказальна, што днямі мы атрымалі адказ зь міліцыі, дзе казалася пра прыпыненьне нашай справы з прычыны таго, што… няма злодзеяў. Ну, дык зараз няхай шукаюць".

Спадарыня Процька таксама заўважыла: першы ды другі раз на месца здарэньня адразу ж выяжджалі супрацоўнікі аддзелу барацьбы з эканамічнай злачыннасьцю. Зараз усе працэдуры абышліся бязь іхнага ўдзелу.
XS
SM
MD
LG