Лінкі ўнівэрсальнага доступу

ПСЫХІЧНА ХВОРЫХ ЛЮДЗЕЙ У МАГІЛЁВЕ ПРЫМУШАЮЦЬ ПАДПІСВАЦЦА ЗА ЛУКАШЭНКУ


Аляксандар Сердзюкоў, Магілёў

Галоўны доктар магілёўскага абласнога псыхіятрычнага шпіталю Аляксандар Кавалёў на сходзе працоўнага калектыву заявіў, што кожны супрацоўнік мусіць сабраць подпісы падтрымкі Аляксандра Лукашэнкі. Да супрацоўнікаў чамусьці залічылі і каля 1000 людзей, што праходзяць курс лячэньня ў шпіталі.

Мэдычныя сёстры, якія пажадалі застацца невядомымі, паведамілі пра тое, як амаль кожнага пацыента гэтай мэдычнай установы прымушалі паставіць свой подпіс за Лукашэнку.

У абласной выбарчай камісіі паведамілі, што свайго подпісу ня мае права паставіць толькі той чалавек, якога суд прызнаў нядзеяздольным, а большасьць хворых людзей да гэтай катэгорыі не належаць.

Аднак нават тыя ж мэдычныя сёстры зьвярнулі ўвагу на маральны бок праблемы. Яны пыталіся: ці можна прымушаць падпісваць дакумэнты чалавека, які іншы раз не ўсьведамляе, што ён робіць?

Агітацыя псыхічна хворых людзей за цяперашняга кіраўніка дзяржавы — гэта не адзінае парушэньне ў ягонай выбарчай кампаніі. Да прапаганды прыцягваюць непаўнагадовых. Як паведамілі жыхары вуліцы Каралёва, да іх прыходзілі непаўнагадовыя студэнткі політэхнікуму і прапаноўвалі паставіць подпіс. На пытаньне "Адкуль вы?" адказвалі: "Зь Беларускага патрыятычнага саюзу моладзі".

У той жа час улада робіць усё, каб перашкодзіць збору подпісаў за альтэрнатыўных кандыдатаў. Учора ўвечары не дапусьцілі зьбіральнікаў подпісаў за Сямёна Домаша ў інтэрнаты тэхналягічнага інстытуту. Камэндантка аднаго зь іх, спадарыня Жукава спаслалася на распараджэньне прарэктара інстытуту па выхаваўчай працы. Калі зьбіральнік подпісаў Аляксандар Страх паспрабаваў трапіць у інтэрнат пад выглядам наведваньня свайго знаёмага, яго выставілі за дзьверы.

У такой жа сытуацыі апынуліся падчас наваедваньня інтэрнату пэдагагічнага ўнівэрсытэту і члены ініцыятыўнай групы Міхаіла Чыгіра.
XS
SM
MD
LG