Лінкі ўнівэрсальнага доступу

ПАРЛЯМЭНЦКАЯ "ТРОЙКА" НАВЕДАЕ БЕЛАРУСЬ НА ПАЧАТКУ ЛІПЕНЯ


Уладзімер Глод, Менск


Сёньня на чарговым паседжаньні Кансультацыйнай рады апазыцыйных палітычных партыяў амбасадар Вік паведаміў, што Парлямэнцкая "тройка" АБСЭ наведае Беларусь 1-3 ліпеня.

Менавіта "тройка" будзе вырашаць, ці прысылаць міжнародных назіральнікаў на прэзыдэнцкія выбары ў Беларусь. Мяркуецца, што "тройка" выкажа і парады наконт рамачных умоваў правядзеньня гэтых выбараў.

А пакуль адзін з прадстаўнікоў "тройкі" — Парлямэнцкая Асамблея АБСЭ праз сваё структурнае падразьдзяленьне — Бюро дэмакратычных інстытутаў і правоў чалавека ладзіць 29-31 траўня ў Варшаве адмысловыя канфэрэнцыі й сэмінар наконт назіраньня за маючымі адбыцца выбарамі.

Чаго чакаць ад візыту "тройкі"? На гэтае пытаньне адказвае ўдзельніца сёньняшняга паседжаньня Кансультацыйнай рады апазыцыйных палітычных партыяў, прадстаўніца Партыі БНФ Галіна Сямдзянава:

(Сямдзянава: ) "Цяжка сказаць. Спадзяваньні заўсёды ёсьць. Таму, магчыма, чым-небудзь дапамогуць. Калі будзе дакладна сфармулявана з нашага боку тое, што мы хочам зрабіць".

(Карэспандэнт: ) "Вы маеце на ўвазе — калі будзе сфармулявана — каб "тройка" магла дапамагчы?"

(Сямдзянава: ) "Так, менавіта так. Калі мы дакладна выкладзем тое, што мы хочам, і тройка будзе ў стане гэта ажыцьцявіць. Не ва ўсім "тройка" можа дапамагчы, бо гэта можа быць расцэнена як спроба ўлезьці ва ўнутраныя справы краіны".

Амбасадар Вік паведаміў, што паміж АБСЭ і афіцыйным кіраўніцтвам Беларусі цяпер ідзе актыўны абмен лістамі ды іншай карэспандэнцыяй. Галоўная тэма, якая абмяркоўваецца —правамоцнасьць фінансаваньня з боку АБСЭ сеткі ўнутранных назіральнікаў за прэзыдэнцкімі выбарамі, якая рыхтуецца грамадзкімі арганізацыямі Беларусі.

У гэтай сувязі стала вядома, што афіцыйны прадстаўнік Беларусі ў АБСЭ амбасадар Гайсёнак разам з кіраўніком управы МЗС Беларусі Грынкевічам маюць намер наведаць Бухарэст для сустрэчы зь дзейным старшынём АБСЭ міністрам замежных спараваў Румыніі Мірчам Джэанам. Яны вязуць з сабой копію дакладной запіскі старшыні КГБ Беларусі Леаніда Ерына наконт дзеяньняў спадара Віка і тлумачэньне да яе.

Між тым, сёньня Кансультацыйная рада апазыцыйных палітычных партыяў прыняла адмысловую заяву пад назовам "Аб сытуацыі вакол дзейнасьці КНГ АБСЭ ў Беларусі". У ёй падкрэсьліваецца: беларускія ўлады хочуць пазбавіцца ад амбасадара Віка, бо такі крок можа паралізаваць дзейнасьць КНГ і даць уладам магчымасьць правесьці выбары паводле свайго сцэнару.
XS
SM
MD
LG