Лінкі ўнівэрсальнага доступу

АЙЦУ ІВАНУ СПАСЮКУ ЗНОЎ НЕ ДАЮЦЬ СЛУЖЫЦЬ


Сяргей Астрайцоў, Горадня

Айцец Спасюк належыць да Беларускай Народнай Праваслаўнай Царквы, таму яго ўвесь час цкуюць улады. Летась ён адседзеў пяць сутак арышту за тое, што вёў набажэнства ў сваёй царкве. Яна знаходзіцца ў пасёлку Пагранічны ў брэзентавым намёце. 17 траўня ў вёсцы Рудаўляны айцец Іван адпяваў нябожчыцу, і жыхары вёскі запрасілі яго прыехаць у панядзелак, каб правесьці набажэнства з нагоды сьвята Яна Багаслова. 21 траўня ў Рудаўляны першымі прыехалі адразу тры сьвятары афіцыйнай царквы – Рускай Праваслаўнай. Прычым яны прывезьлі сваіх вернікаў, зламалі замок і трапілі ў капліцу. Івану Спасюку яны не дазволілі правіць службу, але яго сталі абараняць вернікі. Тады яго дапусьцілі, каб праводзіў службу ў царкве. Вось што кажуць самі верніцы:

(Ніна Андрушэвіч: ) “Мы ходзім у царкву беларускую, да айца Яна, а сьвяшчэньнікі распаўсюджваюць чуткі, што мы ходзім толькі з-за таго, што нам плоцяць даляры. І ўсе людзі ў Пагранічным, якія ходзяць туды, да Сергія, кажуць, што нам плоцяць даляры. Мы кажам: прыдзеце вы, і вам заплоцяць. Але яны ня йдуць чамусьці. Ну і хай ня йдуць”.

(Тацяна Каскевіч: ) “Людзі абураліся, сталі гаварыць, каб яны пусьцілі сьвятара. Тады айцец Сергі са злосьцю сказаў: “Калі хоча служыць, хай ідзе,” – і паказаў на сярэдзіну каплічкі, а потым пачалася служба і за царскаю брамай, і ўсярэдзіне”.

Міліцыя склала чатыры пратаколы – два на адміністрацыйную камісію, два – у суд. Івана Спасюка перш за ўсё абвінавачваюць у тым, што ня меў быццам бы права хаваць нябожчыка і весьці набажэнства. Яго ж абвінавачваюць у тым, што сарваў службу ў капліцы тром прыезжым сьвятарам, а яго жонку – што яна нецэнзурна выказвалася адносна іх за тое, што не даюць спакою ейнаму мужу.
XS
SM
MD
LG