Лінкі ўнівэрсальнага доступу

ПРАВААБАРОНЦЫ НАЗВАЛІ ДЗЕЯНЬНІ СУПРАЦОЎНІКАЎ СПЭЦСЛУЖБАЎ У ЦЫВІЛЬНЫМ 18 ТРАЎНЯ Ў МЕНСКУ БАНДЫЦКІМІ


Алег Грузьдзіловіч, Менск

Праваабарончыя арганізацыі Беларусі пратэстуюць супраць гвалту, учыненага невядомымі супрацоўнікамі беларускіх спэцслужбаў да мірных пікетоўцаў.

Як вядома, 18 траўня ў Менску разагналі два пікеты, у тым ліку пікет на Кастрычніцкай плошчы, якім нагадвалі пра зьніклых апазыцыянэраў. Пікетоўцаў зьбівалі й затрымлівалі асобы, якія не называлі сябе і не паказвалі дакумэнтаў.

Праваабарончы цэнтар "Вясна" і Цэнтар прававой дапамогі насельніцтву выступілі з заявамі, у якіх пратэстуюць супраць такіх дзеяньняў уладаў і патрабуюць ад пракуратуры й Міністэрства ўнутраных справаў знайсьці й пакараць вінаватых.

Кіраўніца Цэнтру прававой дапамогі насельніцтву Вера Страмкоўская таксама ўдзельнічала ў падзеях на Кастрычніцкай плошчы. Яна кажа, што ніколі ў жыцьці гэтак не баялася, як у той момант, калі яе схапілі невядомыя асобы ў цывільным.

(Страмкоўская: ) "Гэтыя людзі былі ў цывільным, але ўсе яны выглядалі як вайскоўцы. Моцныя такія, каротка пастрыжаныя. У вачах было нешта — падавалася, што яны ці то ўжывалі нейкія наркотыкі ці што іншае.

Мабыць, гэта нейкая спэцслужба — калі яны ўжываюць такое, калі гэтак нацкаваныя на людзей. Твары без эмоцыяў зусім, ні на што не рэагавалі, што адбывалася вакол. Толькі зьбівалі людзей. Затрымлівалі і цягнулі, у мэтро ці ў нейкія аўтобусы. Альбо спрабавалі нас выціснуць з вуліцы, запхнуць у мэтро.

Яны моўчкі ўсё гэта рабілі, але на нейкі загад. Загад атрымлівалі па сувязі, кожны зь іх меў мабільны тэлефон".

Многія, да каго невядомыя ўжылі сілу, зьвярнуліся ў пракуратуру. Занесла туды заяву і Вера Страмкоўская.

Але што рабіць чалавеку не пасьля таго, як невядомыя яго схапілі й зацягнулі ў мэтро ці аўтобус, а ў момант нападу? Ці мае чалавек права не падпарадкоўвацца гвалту? Адвакатка Страмкоўская лічыць, што так.

(Страмкоўская: ) "Ні ў якім разе не падпарадкоўвацца, калі яны не называюць сябе і не паказваюць дакумэнтаў, якія патрэбныя ў такіх выпадках. Трэба клікаць людзей на дапамогу, крычаць, каб нехта дапамог і спрабаваць ад іх уцячы. Як юрыст я не магу даць іншай парады ва ўмовах, калі шайкі нейкіх бандытаў дзейнічаюць у горадзе і ніхто не нясе за гэта адказнасьці".

Паводле Страмкоўскай, у судзе дзеяньні дзеля абароны ад невядомых асобаў павінны быць апраўданыя. Адвакатка спасылаецца на новы Крымінальны кодэкс, які прадугледжвае права чалавека нават на затрыманьне тых, хто ўчыняе злачынства.

А дзеяньні невядомых, якія хапаюць і некуды цягнуць людзей, інакш як злачынныя суд кваліфікаваць ня можа, лічыць Вера Страмкоўская. Дзеля затрыманьня такіх асобаў яна раіць ужываць электрашокеры і балёнчыкі са сьлезацечным газам.

Між тым, ніводнае зь сілавых ведамстваў не прызнала, што гэта ягоныя супрацоўнікі 18 траўня разганялі пікеты. Як у прэсавай службе МУС, гэтак і ў аддзеле сувязяў з грамадзкасьцю КГБ мне заявілі, што гэтыя ведамствы ня маюць дачыненьня да разгону пікетаў.
XS
SM
MD
LG