Сёньня судовая сыстэма Беларусі чарговы раз запаліла чырвонае сьвятло перад незалежнымі назіральнікамі за выбарамі. Калегія па грамадзянскіх справах Менскага гарадзкога суда на чале з судзьдзёй Жупікавай пацьвердзіла ранейшае рашэньне Маскоўскага раённага суда, які пастанавіў, што грамадзяне ня могуць абскарджваць вынікаў галасаваньня праз суд.
Гэтае рашэньне прынялі ў адказ на зварот у суд назіральнікаў Беларускага Гельсынскага камітэту. Яны сабралі шматлікія доказы фальсыфікацыі мінулых выбараў у так званую "палату прадстаўнікоў" і спрабавалі аспрэчыць вынікі па некаторых акругах, у прыватнасьці, па Маладэчанскай.
Аднак спачатку Маскоўскі раённы суд, а цяпер і гарадзкі, адхілілі скаргу назіральнікаў. Больш за тое, яны пастанавілі, што грамадзяне ўвогуле ня маюць права аспрэчваць вынікі, зацьверджаныя Цэнтральнай выбарчай камісіяй.
"Гэта супярэчыць 30-му артыкулу Канстытуцыі", — лічыць намесьнік старшыні БГК Гары Пагаляйла. Ён жа зьвяртае ўвагу на тое, што такое судовае рашэньне будзе небясьпечнае для сёлетніх прэзыдэнцкіх выбараў.
(Паганяйла: ) "Як паказала практыка выбараў у мясцовыя органы і ў "палату прадстаўнікоў", ідзе масавая фальсыфікацыя вынікаў падліку галасоў, масава парушаюцца правы выбарнікаў.
У гэтых умовах адзінай гарантыяй можа быць дзейнасьць назіральнікаў за выбарамі. Але яны павінны мець магчымасьць ня толькі назіраць, але і аспрэчваць тыя вынікі, якія ім падаюцца памылковымі. Адзіны цывілізаваны шлях дзеля гэтага — суд.
Вось чаму мы лічым, што рашэньне судзьдзяў не прымаць гэтых скаргаў да разгляду ёсьць пазбаўленьнем грамадзянаў права кантраляваць уладу. Напярэдадні прэзыдэнцкіх выбараў нас наўмысна пазбаўляюць магчымасьці ў судзе абскарджваць вынікі галасаваньня".
Цяпер БГК зьбіраецца апэляваць да Вярхоўнага суда. А калі рашэньня ня зьменяць, БГК думае зьвяртацца ў Канстытуцыйны суд. "Яшчэ ёсьць час абараніць праз закон нашае права не пагаджацца з фальсыфікацыяй выбараў", — заяўляюць назіральнікі з БГК.
