Лінкі ўнівэрсальнага доступу

ПАЙШЛІ 13-Я СУТКІ ГАЛАДОЎКІ Ў БАБРУЙСКУ АЛЕНЫ ЗАХОЖАЙ


Міхал Стэльмак, Бабруйск

Сёньня Алена Захожая трымала галадоўку на працоўным месцы. Нягледзячы на пратэст лекараў, яна дамаглася, каб ёй далі вытворчае заданьне. Між тым, адчувае яна сябе кепска — на 13-я суткі галадоўкі ёй пачалі балець ныркі.

Адміністрацыя "Белшыны" па-ранейшаму ігнаруе ейнае патрабаваньне — ёй не даюць даведкі пра наяўнасьць у прафсаюзу юрыдычнага адрасу. Кіраўніцтва камбінату, паводле прафсаюзных зьвестак, учыніла гвалтоўны захоп памяшканьня офісу прафсаюзу. Праверыць гэта Алена Захожая даручыла аднаму зь сяброў прафсаюзнай суполкі "Белшыны":

(Захожая: ) "Сёньня пайшоў Міхаіл Усьціновіч у наш офіс, але ўвайсьці туды ня змог. Ахоўнік кажа, што нічога ня ведаю. Паспрабаваў ключом Усьціновіч адчыніць замок, але безвынікова. Ён прыйшоў і сказаў мне пра гэта. Што далей, пакуль ня ведаю".

Паводле іншых крыніцаў, захоп прафсаюзнага памяшканьня адбыўся яшчэ ў пятніцу, калі ля прахадной "Белшыны" адбывалася акцыя салідарнасьці. Намесьнік старшыні Беларускага незалежнага прафсаюзу Мікалай Зімін, які браў удзел у гэтай акцыі, паведаміў наступныя падрабязнасьці:

(Зімін: ) "Калі я прыйшоў на прахадную, дзе знаходзіўся офіс незалежнага прафсаюзу, мне ахоўнік сказаў, што тут ужо нічога няма. Замок зьменены, мы правялі перапіс усіх рэчаў, якія там былі, і таму вы сюды не патрапіце".

Сёньня ж Мікалай Зімін зь лідэрам "Рабочай самадапамогі" Сяргеем Антончыкам, які таксама 11 траўня ў Бабруйску браў удзел у акцыі салідарнасьці, наведалі ў Менску дзяржаўны канцэрн "Белнафтахім". "Белшына" падпарадкаваная гэтаму канцэрну, і спадары Зімін ды Антончык мелі спадзяваньне, што кіраўніцтва "Белнафтахіму" нейкім чынам паўплывае на пазыцыю падначаленых.

Яны сустрэліся з прэзыдэнтам канцэрну Іванам Бамбізам. Пра вынікі гэтай сустрэчы распавёў нашаму радыё Сяргей Антончык:

(Антончык: ) "Я быў у Бамбізы зь Зіміным. Ён быў ня рады нашаму прыходу. Ягоны адказ быў няпэўны — ні так, ні не. Ён не сказаў, што ня будзе займацца, але зазначыў, што гэта па-за ягонай кампэтэнцыяй і што ён ня можа прымусіць дырэктара. Сказаў, хай Захожая атрымае адрас для свайго офісу, напрыклад, такім чынам — паставіць палатку насупраць "Белшыны". Адным словам, гэта цынічна", — паведаміў Сяргей Антончык.
XS
SM
MD
LG