Лінкі ўнівэрсальнага доступу

logo-print

МАЛАДАФРОНТАЎЦЫ ВЫБІРАЛІ СЁНЬНЯ ПРЭЗЫДЭНТА ЗЬ ЛІКУ МЕНСКІХ ПОМНІКАЎ ГІСТАРЫЧНЫМ АСОБАМ


Альгерд Невяроўскі, Менск

Акцыя мела назву "Прэзыдэнцкія выбары сярод помнікаў Менску". Каля 10 сяброў Маладога Фронту са скрынямі "Выбары-2001" дзьве гадзіны хадзілі па цэнтральных вуліцах гораду й прапаноўвалі мінакам узяць удзел у імправізаваным галасаваньні.

Адна з арганізатарак акцыі, прэсавая сакратарка Маладога Фронту Стася Басава так патлумачыла мэту гэтага мерапрыемства:

(Басава: ) "Мы хочам паказаць, што беларускія людзі змогуць дастойна зрабіць свой выбар на будучых прэзыдэнцкіх выбарах. Зараз гэта нібы гульня, але яна, думаем, пакажа, на што гатовыя беларусы".

У сьпіс для галасаваньня занесьлі "прозьвішчы" 10 менскіх помнікаў. Максім Багдановіч стаў кандыдатам ад аб’яднаных дэмакратычных сілаў, Фэлікс Дзяржынскі — ад КГБ. Уладзімер Ленін прадстаўляў ПКБ-КПБ, іншыя бальшавіцкія правадыры — Міхаіл Калінін і Сяргей Кіраў — былі кандыдатамі ад аграр'еў і прамыслоўцаў. Янка Купала зь Якубам Коласам прадстаўлялі беларускі народ і ягоную творчую інтэлігенцыю. Партызан Марат Казей быў кандыдатам ад эколягаў, а помнік танку "Т-34" прадстаўляў вайскоўцаў.

Удзел у гэтым галасаваньні ўзялі 95 чалавек рознага веку. Пасьля падліку бюлетэняў бясспрэчным лідэрам галасаваньня сярод менчукоў (62 галасы "за"), стаў помнік Максіму Багдановічу. Ніводнага голасу ня мелі Дзяржынскі з Кіравым. Сямёра апытаных лічаць, што найлепшым прэзыдэнтам Беларусі мог бы стаць танк "Т-34".

Маладафронтаўцы былі задаволеныя вынікамі імправізаванага галасаваньня. Гаворыць старшыня выбарчай камісіі Стася Басава:

(Басава: ) "Вынікі вельмі станоўчыя, бо большасьць людзей усё ж аддалі свой голас за сапраўднага беларускага патрыёта — за Багдановіча".

Міліцыя ніяк не адрэагавала на несанкцыянаваную акцыю маладафронтаўцаў. Лідэр Маладога Фронту Павал Севярынец паведаміў, што ягоныя сябры будуць і надалей арганізоўваць розныя акцыі, каб прыцягнуць на будучыя прэзыдэнцкія выбары як мага большую колькасьць грамадзянаў.
XS
SM
MD
LG