Лінкі ўнівэрсальнага доступу

У ВІЦЕБСКУ РАПТАМ УСЧАЛІСЯ ПОШУКІ ЎДЗЕЛЬНІКАЎ СЬВЯТКАВАНЬНЯ 25 САКАВІКА


Браніслава Станкевіч, Віцебск

Сябра КХП БНФ Уладзімер Плешчанка паведаміў, што да яго проста на вуліцы зьвярнуўся супрацоўнік Кастрычніцкага РАУС з просьбай зайсьці для тэрміновай размовы. Пры гэтым міліцыянт спаслаўся на загад свайго кіраўніцтва адшукаць арганізатараў і ўдзельнікаў сьвяточных імпрэзаў 25 сакавіка. Размова ў пастарнуку, якая адбылася 9 красавіка а 16 гадзіне, скончылася складаньнем патаколу, паводле якога спадар Плешчанка нібыта зьяўляецца арганізатарам несанкцыянаванага мітынгу, які адбыўся 25 сакавіка на Пляцы Волі.
Спадар Плешчанка падпісваць той пратакол адмовіўся.

У той самы вечар і ў той самы пастарунак была выкліканая спадарыня Вольга Кладава. 25 скавіка сярод іншых сяброўз КХП БНФ яна стаяла поруч са спадаром Плешчанкам, які трымаў віншавальны плякат. Міліцыянты ж патрабавалі засьведчыць, што ён ладзіў мітынг. Зрабіць гэта спадарыня Кладава адмовілася.

І яшчэ адзін удзельнік прамінулых падзеяў трапіў у поле зроку міліцыянтаў. Дарэчы, з таго самага Кастрычніцкага РАУС. Гэта Пётар Сарапеня, таксама сябар КХП БНФ. Колькі дзён таму на Віцебскім аўтарынку ён перадаваў улёткі “Беларускай салідарнасьці” сваім сябрам. Гэта было заўважанае тамтэйшым ахоўнікам, і ягоны рапарт стаўся падставаю для затрыманьня Пётры Сарапені ды складаньня пратакола, у якім, у прыватнасьці, гаворыцца, што спадар Сарапеня распаўсюджваў улёткі, зьмест якіх скіраваны на падрыў канстытуцыйнага ладу РБ. Неўзабаве гэтыя абвінавачаньні будуць разглядацца ў судзе, а мы нагадаем, што непасрэдна ў дзень 25 сакавіка ніводнага затрыманьня ці эксцэсу паміж віцебскімі апазыцыянэрамі ды прадстаўнікамі міліцыі дакумэнтальна не зафіксавана. Таму нечаканую актывізацыю праваахоўных ворганаў прадстаўнікі віцебскай апазыцыі зьвязваюць зь верагоднымі загадамі менскага кіраўніцтва.
XS
SM
MD
LG