Лінкі ўнівэрсальнага доступу

CТАРШЫНЯ ПАРТЫІ БНФ ВІНЦУК ВЯЧОКА ЛІЧЫЦЬ, ШТО ЯГО АРЫШТАВАЛІ НА 15 СУТАК ПА ЎКАЗАНЬНІ ПАЛІТЫЧНАГА КІРАЎНІЦТВА КРАІНЫ


Ягор Маёрчык, Менск

На заключным паседжаньні судзьдзя Натальля Вайцяховіч заслухала двух сьведкаў: міліцыянта Анісенку і намесьніка начальніка Цэнтральнага РАУСу Барсукова. Апошні адкрыта хлусіў, сьцьвярджаючы, што Вінцук Вячорка ў часе несанкцыянаванага шэсьця трымаў у руках мэгафон і кіраваў акцыяй.

Судзьдзя Вайцяховіч не прыняла да ўвагі 2 хадайніцтвы адваката спадара Вячоркі Сяргея Цурка — аб прыцягненьні да працэсу іншых міліцэйскіх сьведкаў, а таксама спыненьні слуханьняў, пакуль ня стане вядомае рашэньне Маскоўскага райсуду ў справе скаргі Вячаслава Сіўчыка аб парушэньні 25 сакавіка гарадзкімі ўладамі заканадаўства.

А палове на шостую вечара, ня даўшы слова сп. Вячорку і ягонаму адвакату Сяргею Цурыну, не зачытаўшы ўсіх матэрыялаў справы, судзьдзя Вайцяховіч нечакана для прысутных зачытала вырак — 15 сутак арышту. Да таго часу міліцэйскі варанок чакаў будучага вязьня ля ўваходу ў будынак суду.

Лідэр партыі БНФ адразу быў узяты пад варту і дастаўлены ў ізалятар часовага ўтрыманьня па вуліцы Акрэсьціна. Жонка Арына ледзь пасьпела перадаць яму спартовае адзеньне.

І сам Вінцук Вячорка, і назіральнікі за працэсам не чакалі такога жорсткага прысуду і адзначаюць, што працэс адбыўся са шматлікімі парушэньнямі дзеючага заканадаўства судзьдзёй Натальляй Вайцяховіч. Вінцук Вячорка, накіроўваючыся да міліцэйскага варанку, заявіў журналістам, што такі вырак ёсьць беспасярэднім указаньнем палітычнага кіраўніцтва краіны.
XS
SM
MD
LG