Лінкі ўнівэрсальнага доступу

МАЛАДЫ ФРОНТ ПРАВЯДЗЕ АКЦЫЮ НА ФУТБОЛЕ


Віталь Цыганкоў, Менск

Упершыню нацыянальная футбольная зборная Беларусі мае рэальныя шанцы трапіць у фінал Чэмпіянату сьвету. Зараз беларусы дзеляць другое-трэцяе месцы, маючы аднолькавыя паказчыкі са зборнай Украіны.

На першым месцы даволі нечакана для адмыслоўцаў апынулася зборная Польшчы, а сёньняшнія супэрнікі беларусаў нарвэжцы, якія лічыліся фаварытамі групы, сэнсацыйна займаюць апошняе месца ў табліцы.

Як паведамілі мне ў прэсавай службе Беларускай Фэдэрацыі футболу, на матч пажадала акрэдытавацца каля 150 журналістаў. Сярод іх звыш 40 нарвэскіх, ёсьць таксама ўкраінскія, нямецкія й турэцкія. Лёжа прэсы стадыёну “Дынама” ня можа ўмясьціць гэтулькі людзей, таму Фэдэрацыя вымушаная была адмовіць у акрэдытацыі найперш беларускім журналістам.

Чакаецца, што ўпершыню за апошнія гады на сталічным стадыёне “Дынама” будзе аншляг. Ужо цяпер распрадалі амаль усе квіткі. Сёньня з раніцы па Менску бадзяюцца заўзятары — пераважна падлеткі — якія прыехалі зь іншых гарадоў Беларусі падтрымаць нацыянальную зборную.

Відавочна, заўзятараў не палохае адносна халоднае надвор’е, якое ўсталявалася ў беларускай сталіцы. Зрэшты, менавіта дзякуючы такому сухому й сонечнаму надвор’ю ўдалося добра падрыхтаваць футбольнае поле да сёньняшняй гульні.

Улічваючы вялізны інтарэс да гэтага матчу, Малады Фронт мае намер правесьці на стадыёне яркую і прыкметную акцыю. Гаворыць лідэр МФ Павал Севярынец:

(Севярынец: ) "Мы зьбіраемся правесьці маштабную акцыю — акцыю, якую будзе відаць. Таму я раю прыхільнікам футболу на стадыёне і каля тэлевізара ўважліва сачыць ня толькі за тым, што адбываецца на полі, але й за тым, што адбываецца на трыбунах. Гэта будзе арыгінальная і фірмовая маладафронтаўская акцыя. Відаць яе будзе ўсім, сэнс яе раскрыецца якраз падчас матчу. Гэта практычна ўсё, што я магу зараз паведаміць".

Зразумела, што зь меркаваньняў кансьпірацыі спадар Севярынец ня можа распавесьці аб падрабязнасьцях акцыі. Сваю імпрэзу на стадыёне рыхтуюць і актывісты моладзевага руху “Зубар”.

Заўзятары “Зубра” вылучыліся падчас апошняга матчу беларускай зборнай у Кіеве. Сёньня сёньня некалькі "зубраў" правядуць сваю акцыю пры канцы матчу ў адным з сэктароў.

Дарэчы, адным са сьведкаў моладзевых акцыяў, магчыма, стане Аляксандар Лукашэнка. Прынамсі, да апошняга моманту афіцыйныя асобы гаварылі пра намер кіраўніка дзяржавы прысутнічаць на гэтым матчы.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG