Лінкі ўнівэрсальнага доступу

НА СЁНЬНЯШНІМ ПАСЕДЖАНЬНІ КРДС ПЫТАНЬНЕ АДЗІНАГА КАНДЫДАТА НЕ РАЗГЛЯДАЛАСЯ


Альгерд Невяроўскі, Менск

У сёньняшнім паседжаньні Каардынацыйнай рады бралі ўдзел прадстаўнікі амаль усіх яе суб’ектаў, акрамя партыі Працы. Асноўныя пытаньні, якія вырашала Рада – гэта фармаваньне рабочых групаў, што будуць працаваць з сябрамі выбарчых камісіяў і выпрацоўваць палітычную ды эканамічную праграму для кандыдата на прэзыдэнта ад аб’яднанай апазыцыі.

Гаворыць старшыня сёньняшняга паседжаньня КРДС Анатоль Лябедзька:

(Лябедзька: ) “Тыя кандыдаыт, якія на сёньняшні дзень ёсьць, усе разьлічваюць, што менавіта КРДС вырашыць пытаньні нагляду, сыстэмнай працы з камісіямі. Наколькі я валодаю інфармацыя, ніводзін з патэнцыйных кандыдатаў не закладае свае выдаткі на гэтую працу. Яны разьлічваюць, што гэта нехта зробіць. Таму КРДС на сёньняшнім паседжаньні паставіла кропку ў двух пытаньнях – завершаная падрыхтоўчая і створаныя дзьве рабочыя групы”.

Паведаміў сп. Лябедзька.

Першай групай, якая павінна аб’яднаць лепшыя інтэлектуальныя сілы для выпрацоўкі перадвыбарчай плятформы кандыдата, будзе кіраваць Павал Данейка. Гэтая праграма павінна быць распрацаваная ў месячны тэрмін. Групу, што будзе працаваць з сябрамі выбарчых камісіяў і паспрабуе пераканаць іх не рабіць масавых фальсыфікацыяў у дзень галасаваньня, узначалілі Васіль Шлындзікаў і Вячаслаў Сіўчык.

Сябры Каардынацыйнай рады таксама вырашылі наладзіць на наступным тыдні прэзэнтацыю КРДС для замежных дыпляматаў, акрэдытаваных у Беларусі. Гэтая акцыя, на іх думку, дапаможа стварыць Радзе пазытыўны імідж за мяжою.

Пытаньне вызначэньня адзінага кандыдата ад аб’яднанай апазыцыі не было нават унесенае ў парадак дня, хаця паводле рашэньня Каардынацыйнай рады, назваць імя гэтага кандыдата апазыцыянэры павінны да пачатку выбарчай кампаніі. Але, паводле Анатоля Лябедзькі, кандыдаты Домаш, Чыгір, Ганчарык і Казлоўскі пакуль яшчэ не дасягнулі канчатковага пагадненьня паміж сабой і, фактычна, прэтэндуюць на падтрымку адных і тых жа структураў КРДС.

Лідэр АГП працягвае:

(Лябедзька: ) “Хто будзе адзіным кандыдатам? – гэта больш складанае пытаньне. Я тут застаюся асьцярожным аптымістам, хаця не падзяляю падыходы тых, хто кажа, што трэба ісьці чатырма калёнамі, увязвацца ў барацьбу, а потым, маўляў, паглядзім, на каго зробім стаўку. На жаль, мы скаваныя невырашэньнем гэтага пытаньня”.

Сказаў сп.Лябедзька.

Сябры Каардынацыйнай рады таксама прынялі заяву аб падзеях 25 сакавіка, у якой асудзілі дзеяньні ўладаў супраць мірных дэманстрантаў, а таксама заяву аб правядзеньні давыбараў у г.зв. “палату прадстаўнікоў”. КРДС лічыць гэтыя выбары несвабоднымі й несправядлівымі і заклікае міжнародную супольнасьць не прызнаваць вынікі прэзыдэнцкіх выбараў, калі яны будуць праведзеныя паводле адпрацаванай уладамі тэхналёгіі фальсыфікацыяў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG